प्रभात वृत्तसेवा पिंपरी – पिंपरी-चिंचवड महापालिका निवडणुकीच्या पार्श्वभूमीवर शहरातील राजकीय वातावरण चांगलेच तापले आहे. इच्छुकांकडून उमेदवारी अर्जासाठी शुभमुहूर्त शोधण्याची लगबग सुरू झाली आहे. अनेक इच्छुक उमेदवार अर्ज भरण्यापूर्वी थेट ज्योतिषांचा सल्ला घेत असून, शुभ तारीख, वेळ आणि ग्रहयोग जाणून घेण्याची चढाओढ दिसत आहे.पिंपरी चिंचवड महापालिका निवडणूक जवळ येताच प्रचाराबरोबरच ‘ग्रह-नक्षत्रांचे गणित’ मांडण्यासही सुरुवात झाली आहे. नामांकन अर्ज सुरू असले तरी अनेक इच्छुकांनी अर्ज सादर करण्यास अद्याप गती दिलेली नाही. शुभमुहूर्त निघाल्यानंतरच अर्ज भरावा, या विश्वासामुळे अनेक उमेदवार ज्योतिषांकडे सल्लामसलत करत असल्याची माहिती मिळत आहे. शहरातील काही नामवंत ज्योतिषाचार्यांकडे या दिवसांत सतत फोन येत असून, उमेदवारी अर्जासाठी कोणती तारीख व कोणती वेळ शुभ असेल, याबाबत चौकशी होते आहे. पिंपरी-चिंचवडसह पुणे, मराठवाडा आणि खानदेशातही काही संभाव्य उमेदवारांनी जन्मपत्रिका पाठवून निवडून येण्याची शक्यता विचारल्याची माहिती स्थानिक ज्योतिषांनी दिली.उमेदवारांकडून केवळ अर्ज सादर करण्याचा मुहूर्त नव्हे तर मतदान दिवस व निकालाच्या तारखांबाबतही ग्रहयोग तपासले जात असल्याचेही सांगण्यात येते. काही इच्छुक जन्मतारीख, वेळ आणि जन्मस्थळासह भेट देऊन सविस्तर पत्रिका काढून घेत आहेत. ज्योतिषांच्या माहितीनुसार, ठराविक तारखा अर्ज दाखल करण्यासाठी शुभ मानल्या जात असून त्या काळात चंद्र, गुरू आणि शुक्र यांचा सकारात्मक प्रभाव असल्याचा दावा केला जात आहे. काही वेळा ‘राहूकाल’ टाळण्याचाही सल्ला उमेदवारांना दिला जात आहे.याचबरोबर अर्ज सादर करण्याच्या दिवशी कोणत्या मंदिरात जावे, कोणते दान करावे, कोणत्या रंगाचे कपडे परिधान करावेत, तसेच विशेष मंत्रोच्चार करावेत का, याबाबतही सल्लामसलत सुरू आहे. काही उमेदवार तर शुभराशीनुसार विशिष्ट दिशेने कार्यालयातून बाहेर पडण्याचादेखील आग्रह धरत असल्याची माहिती मिळते.महापालिका निवडणूक परंपरेने राजकीय समीकरणांवर ठरते; मात्र यंदा ग्रह-नक्षत्रांच्या गणितालाही उमेदवारांकडून तितकेच महत्त्व दिले जात असल्याचे चित्र पिंपरी-चिंचवडमध्ये पाहायला मिळत आहे.
