प्रभात वृत्तसेवा
पिंपरी – पिंपरी-चिंचवड महापालिकेच्या आगामी निवडणुकीसाठी अंतिम प्रभाग रचना जाहीर होताच प्रभागनिहाय मतदार याद्यांचे काम युद्ध पातळीवर सुरू झाले आहे. त्यासाठी महापालिकेत मतदार यादी कक्ष स्थापन करण्यात आला आहे. महापालिकेच्या ३२ प्रभागाप्रमाणे मतदार यादी फोडणे, मतदान केंद्रानुसार मतदारांची यादी अंतिम करून निवडणूक विभागाला देण्याचे कामकाज केले जाणार आहे.महापालिकेची अंतिम प्रभागरचना जाहीर झाल्यानंतर महापालिका निवडणुकीसाठी आरक्षण सोडतीकडे सर्वांचे लक्ष लागले आहे.

तर, दुसरीकडे निवडणूक आयोगाने महापालिका निवडणुकीची तयारी वेगाने सुरू केली आहे. प्रभागरचना, आरक्षण सोडतीनंतर प्रभागनिहाय मतदार याद्या तयार करणे हा महत्त्वाचा टप्पा आहे. त्याचे काम सुरू झाले आहे. महापालिकेचे अतिरिक्त आयुक्त प्रदीप जांभळे पाटील यांच्या नियंत्रणाखाली स्वतंत्र मतदार यादी कक्ष तयार करण्यात आला आहे. या कक्षासाठी स्मार्ट सिटीचे सहआयुक्त किरणराज यादव, सहायक आयुक्त किरणकुमार मोरे, राजीव घुले यांच्यासह ४३ अधिकारी, कर्मचाऱ्यांच्या नियुक्ती करण्यात आली आहे. त्यानुसार, या कामाला सुरूवात करण्यात आली आहे.

महापालिकेच्या अंतिम झालेल्या प्रभागरचनेनुसार ३२ प्रभागांचा समावेश आहे. या प्रभागांची स्वतंत्र मतदार यादी तयार करण्यासाठी निवडणूक आयोगाने महापालिकांना मतदार यादीचे विशेष संकेतस्थळ उपलब्ध करून दिले आहे. विधानसभा मतदारसंघातील भाग क्रमांकानुसार यादी डाउनलोड करून मुख्य मतदार यादी तयार केली जाईल. नंतर प्रभागनिहाय मतदार यादी तयार केली जाणार आहे. निवडणूक आयोगाने १ जुलै २०२५ रोजी अस्तित्वात असलेली महाराष्ट्र विधानसभेची मतदार यादी मुख्य मतदार यादी म्हणून वापरण्याचे निर्देश दिले आहेत. त्यामुळे ज्यांची नावे १ जुलै २०२५ पर्यंत नोंदवलेली आहेत. त्याच मतदारांना आगामी महापालिका निवडणुकांसाठी मतदान करता येणार आहे, असेही अधिकाऱ्यांनी स्पष्ट केले आहे.

एका प्रभागात ४५ ते ५५ हजार मतदार..
विधानसभेची मतदार यादी फोडून १ ते ३२ अशी प्रभागात ती विभागली जाईल. त्या ३२ मतदार याद्या महापालिकेकडून उपलब्ध करून दिल्या जाणार आहेत. सन २०१७ मधील निवडणुकीत एका प्रभागात किमान २६ हजार आणि कमाल ४९ हजार इतकी मतदार संख्या होती. मात्र, मतदारांची संख्या वाढल्यामुळे प्रभागांमध्ये ४५ हजारांपेक्षा जास्तच मतदार असणार आहे. तर काही प्रभागात मतदारांची संख्या ५५ हजारांपर्यत जाईल, अशी शक्यता आहे.

शहराची विधानसभानिहाय मतदारसंख्या..
-पिंपरी : ३ लाख ९९ हजार ८००
-चिंचवड : ६ लाख ७९ हजार ८५८
-भोसरी : ६ लाख २९ हजार १२९
-एकूण : १७ लाख ८ हजार ७८७

“राज्य निवडणूक आयोगाच्या निर्देशानुसार अंतिम प्रभागरचनेप्रमाणे ३२ प्रभागांची प्रभागनिहाय मतदार यादी तयार करण्याचे काम सुरू झालेले आहे. या संदर्भात निवडणूक आयोगाने विविध निर्देश दिले आहेत. त्या प्रमाणे मतदार यादी कक्षामार्फत कार्यवाही सुरु आहे.”
– प्रदीप जांभळे, अतिरिक्त आयुक्त, पिं. चि. महापालिका