प्रभात वृत्तसेवा पिंपरी – पिंपरी-चिंचवड महापालिकेच्या निवडणुकीचा बिगुल वाजताच शहरातील राजकीय वातावरण चांगलेच तापले आहे. उमेदवारी कोणाला मिळणार, याची उत्सुकता वाढत असतानाच इच्छुकांनी तिकीट मिळविण्यासाठी नव्या पद्धतीच्या रणनीती राबवायला सुरुवात केली आहे. केवळ पारंपरिक प्रचारावर न थांबता समाजातील प्रभावी व्यक्ती, प्रतिष्ठित नागरिक आणि ज्येष्ठ मंडळींना पुढे करून पक्षनेतृत्वावर आपली छाप पडावी, यासाठी प्रयत्न सुरू आहेत. शहरातील प्रमुख राजकीय पक्षांकडे उमेदवारीसाठी इच्छुकांची मोठी रांग लागली असून बहुतेक पक्षांनी उमेदवारांच्या मुलाखतीची प्राथमिक प्रक्रिया पूर्ण केली आहे. अर्ज दाखल करण्यासही सुरुवात झाली असली तरी अंतिम तिकीट कोणाच्या वाट्याला येणार, याबाबत संभ्रम कायम आहे. त्यामुळे अनेक इच्छुकांनी नेतेमंडळींच्या भेटीगाठी वाढवल्या असून वेगवेगळ्या पातळ्यांवर लॉबिंगला गती मिळाली आहे. विस्तारित प्रभाग, वाढलेली डोकेदुखी नव्या प्रभागरचनेमुळे पिंपरी-चिंचवडमध्ये प्रभागांची भौगोलिक व्याप्ती लक्षणीयरीत्या वाढली आहे. मोठ्या क्षेत्रात विखुरलेले मतदार, विविध वसाहती आणि वाढती लोकसंख्या यामुळे संभाव्य उमेदवारांवर प्रचंड दबाव निर्माण झाला आहे. एवढ्या विस्तीर्ण प्रभागात सर्वसमावेशक संपर्क कसा साधायचा, हे मोठे आव्हान ठरत आहे. प्रचार खर्चाचा बार वाढला प्रभाग विस्तारानंतर निवडणूक खर्चात मोठी वाढ होणार हे जवळपास निश्चित झाले आहे. ४५ ते ५५ हजार मतदारसंख्या असलेल्या प्रभागात किमान १८ ते २० हजार मतांची जोडणी करणे आवश्यक ठरणार आहे. आधीच्या निवडणुकीतच काही उमेदवारांचा खर्च लाखोंच्या घरात पोहोचला होता. आता प्रभाग मोठे झाल्याने संभाव्य खर्च ऐकूनच इच्छुकांची चिंता अधिक वाढली आहे. पक्षाचे अधिकृत तिकीट मिळाल्यास आर्थिक पाठबळ व संघटनात्मक यंत्रणा उपलब्ध होईल या अपेक्षेने अनेकांनी पक्षनेत्यांची मनधरणी सुरू केली आहे. काही इच्छुक तर नेत्यांच्या बंगल्यांवर आणि कार्यालयांवर थेट ठाण मांडून बसल्याचे सांगितले जाते. प्रभावी शिफारसींच्या शोधात इच्छुक पुढे सरसावण्यासाठी अनेक इच्छुकांनी प्रतिष्ठित नागरिक, विविध संघटनांचे पदाधिकारी आणि स्थानिक प्रभावी व्यक्तींमार्फत शिफारसी पोहोचवण्याचे प्रयत्न सुरू केले आहेत. “हा उमेदवार जिंकू शकतो” असा ठसा पक्षनेतृत्वावर उमटावा, यासाठी बैठका, स्नेहभोजन, छोटे कार्यक्रम आणि सततचा संपर्क या मार्गांचा अवलंब केला जात आहे. यावरून, पिंपरी-चिंचवड महापालिकेची निवडणूक यंदा केवळ राजकीय लढत नसून उमेदवारांच्या संयम, संघटनशक्ती आणि आर्थिक बळाची मोठी परीक्षा ठरणार आहे, हे चित्र स्पष्ट झाले आहे.
