PCB Demands NOC Fees For Abu Dhabi T10 League Pakistani Players : पीसीबी आणि त्याचे अध्यक्ष मोहसीन नक्वी पुन्हा एकदा आपल्या वादग्रस्त आणि अजब कारभारासाठी आंतरराष्ट्रीय क्रिकेट वर्तुळात टीकेचे धनी ठरले आहेत. पीसीबीने आपल्याच देशातील खेळाडूंना परदेशी टी-२० आणि टी-१० लीगमध्ये खेळण्यासाठी लागणाऱ्या ‘ना हरकत प्रमाणपत्रा’च्या (NOC) बदल्यात चक्क पैशांची मागणी केली. अबूधाबी टी-१० लीगमध्ये सहभागी होणाऱ्या १६ पाकिस्तानी खेळाडूंचे एनओसी बोर्डाने रोखून धरले होते. प्रतिखेळाडू तब्बल १० हजार अमेरिकन डॉलर्सची (सुमारे ८.३ लाख रुपये) मागणी करण्यात आली होती; अखेर वाद चिघळल्यानंतर आयोजक आणि पीसीबीमध्ये तडजोड होऊन खेळाडूंचा मार्ग मोकळा झाला आहे.

खेळाडू स्वतःच्या खिशातून पैसे भरायला होते तयार –

अबूधाबी टी-१० लीगच्या आयोजकांनी खेळाडूंच्या ड्राफ्टनंतर तत्काळ एनओसीसाठी अर्ज केला होता. मात्र, स्पर्धा सुरू होण्याच्या ऐन तोंडावर पीसीबीने प्रतिखेळाडू १० हजार डॉलर्स फी मागून फ्रँचायझींना पेचात टाकले. फ्रँचायझींसमोर इतर देशांच्या खेळाडूंना संघात घेण्याचा किंवा फी भरण्याचा पर्याय होता. परिस्थिती इतकी बिकट झाली होती की, लीगमध्ये खेळता यावे म्हणून काही पाकिस्तानी खेळाडू स्वतःच्या मॅच फीमधून किंवा पगारातून हे पैसे बोर्डाला भरण्यास तयार झाले होते.

१६ स्टार खेळाडूंच्या भवितव्यावर लटकली होती तलवार –

🚨 PCB’S NOC DEMANDS RAISE QUESTIONS!

The PCB’s reported NOC fees are creating hurdles for Pakistani players and overseas franchises, including those in the NPL.

Is the PCB protecting its interests or limiting opportunities for its own players? 🤔

#NSJ #NepalCricket #PCB https://t.co/L9ybCQVyHG

— Nepal Sport Junction (@NepalSportJncn) November 5, 2026

या लीगच्या ड्राफ्टमध्ये पाच वेगवेगळ्या संघांनी पाकिस्तानच्या तब्बल १६ प्रमुख खेळाडूंची निवड केली होती. यामध्ये नसीम शाह, शादाब खान, फखर झमान, इफ्तिखार अहमद, मोहम्मद वसीम ज्युनियर, फहीम अशरफ, खुशदिल शाह, आझम खान आणि अब्बास आफ्रिदी यांसारख्या मोठ्या आंतरराष्ट्रीय स्टार्सचा समावेश आहे. पीसीबीच्या पैशांच्या अट्टहासामुळे या खेळाडूंच्या खेळण्यावर थेट संक्रांत आली होती आणि फ्रँचायझींनी पर्यायी खेळाडूंचा शोध सुरू केला होता.

२ लाख डॉलर्सच्या पॅकेजवर अखेर पडदा; ७ नोव्हेंबरपासून स्पर्धा

🇵🇰 | Abu Dhabi T10 organizers reportedly offered up to USD 200,000 to the PCB to resolve the NOC issue for 16 players.

PCB previously requested a fee of USD 25,000 / player to participate in the Nepal Premier League.

📷 Abu Dhabi Cricket https://t.co/9ehewdPep7

— SportsGully Cricket 🏏 (@sportsgullycric) November 6, 2026

सुरुवातीला या पैशांच्या मागणीवरून तीव्र वाद निर्माण झाला होता. मात्र, ‘जिओ न्यूज’च्या वृत्तानुसार, अखेर पीसीबी आणि अबूधाबी टी-१० लीगच्या आयोजकांमध्ये समझोता झाला आहे. या करारानुसार लीग आयोजक पीसीबीला जवळपास २ लाख अमेरिकन डॉलर्सची (सुमारे १.६६ कोटी रुपये) नुकसानभरपाई आणि सुविधा पुरवणार आहेत. या तोडग्यानंतर पीसीबीने सर्व खेळाडूंना एनओसी जारी केली असून, ७ नोव्हेंबरपासून सुरू होणाऱ्या या स्पर्धेत आता हे खेळाडू मैदानात उतरू शकणार आहेत.

हेही वाचा – Vaibhav Sooryavanshi Captain : युवा स्फोटक फलंदाज वैभव सूर्यवंशीचे नशीब चमकले! थेट संघाच्या कर्णधारपदी झाली निवड

नेपाळ लीगनंतर अबूधाबीत वसुली; खेळाडूंच्या कारकिर्दीशी खेळ

PCB Reportedly Demands $10,000 per NOC, Putting Pakistan Stars’ Abu Dhabi T10 Participation at Risk https://t.co/Wk0M3mgkhR

— M Sports (@themsportspk) November 5, 2026

विदेशी लीगकडून पैसे उकळण्याची पीसीबीची ही पहिलीच वेळ नाही. गेल्या महिन्यात नेपाळ प्रीमियर लीगमध्ये खेळण्यासाठीही पीसीबीने प्रतिखेळाडू २५ हजार डॉलर्स मागितले होते, ज्यामुळे अनेक खेळाडू न खेळताच मायदेशी परतले होते. पीसीएलमध्ये परदेशी खेळाडू येत नसल्याचे कारण पुढे करत पीसीबी इतर लीगमधून नफेखोरी करत आहे. मात्र, बोर्डाच्या या धोरणामुळे जगभरातील लीगमध्ये खेळून उपजीविका करणाऱ्या खेळाडूंच्या आंतरराष्ट्रीय संधी धोक्यात येत असल्याची तीव्र टीका होत आहे.