नगर (प्रतिनिधी) – श्रीगोंदे-नगर तालुक्यातील 32 गावांसाठी मृगजळ ठरलेली साकळाई उपसाजलसिंचन योजनेसाठी वांबोरी चारी मॉडेलप्रमाणे नाबार्डअंतर्गत पाचशे कोटी रुपयांचा निधी देऊन ही योजना तातडीने पूर्ण करण्याची मागणी खासदार डॉक्टर सुजय विखे पाटील यांनी आज लोकसभेत केली.

दरम्यान, यासाठी केंद्र सरकारने जलशक्ती मंत्रालयामार्फत सहाय्य करावे, अशी आग्रही मागणी खासदार डॉ. विखे पाटील यांनी केली. जनहिताच्या विशेष मुद्यांसाठी राखीव असणार्‍या  लोकसभेचा वेळेचा उपयोग विखे पाटील यांनी खुबीने करून घेतला आहे. यावेळी बोलताना खासदार डॉक्टर विखे पाटील म्हणाले, की नगर व श्रीगोंदा तालुक्यातील अवर्षणग्रस्त गावांसाठी साकळाई जलसिंचन उपसा योजना अतिशय महत्त्वपूर्ण असून देखील ही योजना कार्यान्वित होऊ शकली नाही.

गेल्या तीस-चाळीस वर्षांपासून या भागातील शेतकरी या योजनेसाठी संघर्ष करीत आहेत. तत्कालीन मुख्यमंत्री देवेंद्र फडणवीस यांनी या योजनेच्या सर्वेक्षणासाठी निधीची तरतूद देखील केली होती. मात्र, आता राज्यात महाविकास आघाडीचे सरकार आले आहे.

नूतन आघाडीचे सरकार या योजनेकडे तितकेसे गांभीर्याने लक्ष देत नसल्याची खंत देखील खासदार डॉ. विखे पाटील यांनी यावेळी व्यक्त केली. लोकहितासाठी अतिशय महत्त्वपूर्ण असलेली ही योजना निधीअभावी व राज्य सरकारच्या उदासीनतेमुळे अडकू नये. त्यासाठी केंद्र सरकारने पुढाकार घ्यावा, अशी मागणी खासदार डॉ. विखे पाटील यांनी केली.

अहमदनगर जिल्ह्यामध्ये यापूर्वी (स्व.) खासदार बाळासाहेब विखे पाटील यांनी यापूर्वी नाबार्डच्या अर्थसहाय्यातून वांबोरी चारी उभी केली होती. त्यामुळे धरणाच्या उशाशी असून देखील पाण्यापासून वंचित असणार्‍या गावांना कायमस्वरूपी पाणीपुरवठ्याची सोय झाली आहे.

याच योजनेला अनुसरून साकळाई जलसिंचन उपसा योजनेला केंद्र सरकारच्या मार्फत नाबार्डअंतर्गत जर अर्थसाहाय्य मिळाले तर दशकांपासून संघर्ष करणार्‍या 32 गावांतील शेतकर्‍यांना न्याय मिळेल, असा विश्‍वास विखे पाटील यांनी व्यक्त केला.