पिंपरी – रुग्णांना तातडीने आणि सुरक्षितपणे रुग्णालयात पोहोचवण्याची जबाबदारी असलेल्या पिंपरी-चिंचवड महापालिकेच्या रुग्णवाहिकेतूनच रुग्ण स्ट्रेचरसह थेट रस्त्यावर पडल्याची धक्कादायक घटना समोर आली आहे. या घटनेचा व्हिडिओ सोशल मीडियावर व्हायरल होत असून, महापालिकेच्या वैद्यकीय विभागाच्या कार्यपद्धतीवर गंभीर प्रश्न उपस्थित होत आहेत. रुग्णवाहिकेतील रुग्णांच्या सुरक्षिततेची जबाबदारी नेमकी कोणाची? असा सवाल उपस्थित केला जात आहे.

रुग्णवाहिका म्हणजे संकटाच्या काळात रुग्णांसाठी जीवनदायिनी ठरणारी सेवा. मात्र, याच रुग्णवाहिकेतून रुग्ण स्ट्रेचरसह रस्त्यावर पडत असेल, तर या सेवेतील सुरक्षिततेच्या उपाययोजनांचे काय? असा प्रश्न निर्माण होतो. रुग्णाला रुग्णालयात सुरक्षितपणे दाखल करण्याऐवजी त्याच्या जीवाला अधिक धोका निर्माण होण्याची वेळ येत असेल, तर ही बाब अत्यंत गंभीर आहे.

रुग्णाला स्ट्रेचरसह बाहेर काढताना किंवा रुग्णवाहिकेतून उतरवताना आवश्यक खबरदारी घेतली जाते का? स्ट्रेचर व्यवस्थित लॉक केले होते का? रुग्णवाहिकेतील उपकरणांची नियमित तपासणी होते का? संबंधित कर्मचाऱ्यांना आवश्यक प्रशिक्षण दिले आहे का? असे अनेक प्रश्न या घटनेमुळे उपस्थित झाले आहेत. या घटनेमागील नेमके कारण अद्याप स्पष्ट झालेले नसून, त्याची निष्पक्ष चौकशी होणे आवश्यक आहे.

रुग्णवाहिकेतील सुरक्षेच्या व्यवस्थेची तातडीने तपासणी करून संबंधित रुग्णाच्या प्रकृतीची माहिती जाहीर करावी, तसेच दोष आढळल्यास जबाबदारी निश्चित करावी, अशी मागणी नागरिकांकडून होत आहे. या घटनेमुळे पिंपरी चिंचवड महापालिकेच्या वैद्यकीय विभागाची लक्तरे वेशीवर टांगली आहेत.

मुख्य वैद्यकीय अधिकाऱ्यांचा प्रतिसाद नाही
या प्रकरणाबाबत महापालिकेचे मुख्य आरोग्य वैद्यकीय अधिकारी डॉ. लक्ष्मण कोकणे यांच्याशी संपर्क साधण्याचा प्रयत्न केला असता, त्यांनी प्रतिसाद दिला नाही. त्यामुळे या घटनेबाबत महापालिका प्रशासनाची अधिकृत भूमिका समोर आलेली नाही.

Satara: ‘अकोला पॅटर्न’ महाराष्ट्रात राबवणार-सुजात आंबेडकर