Passenger Assaulted – अतिशय किरकोळ कारणावरून एसटी कंडक्टरने प्रवाशाला शिवीगाळ करत मारहाण केल्याची धक्कादायक घटना बेल्हे बसस्थानकावर घडली आहे. तिकिटाचे उरलेले नऊ रुपये परत मागितल्याच्या रागातून हा प्रकार घडल्याने प्रवाशांमध्ये तीव्र संताप व्यक्त केला जात आहे. सार्वजनिक सेवेतील कर्मचाऱ्याकडून अशा प्रकारे प्रवाशाला मारहाण झाल्याने एसटी महामंडळाच्या प्रतिमेवर प्रश्नचिन्ह निर्माण झाले असून, संबंधित कर्मचाऱ्यावर कठोर कारवाईची मागणी होत आहे. मिळालेल्या माहितीनुसार, पाडळी येथील रहिवासी लंकेश तुकाराम शिंदे (वय ४०) हे पाडळी तर्फे आळे ते बेल्हे या मार्गावरून पारनेर आगाराच्या बेल्हे-पारनेर एसटी (एमएच ४० वाय ५४६८) ने प्रवास करत होते. या प्रवासाचे तिकीट ११ रुपये होते. शिंदे यांनी कंडक्टरला २० रुपयांची नोट दिली होती. बस बेल्हे बसस्थानकावर पोहोचल्यानंतर उतरताना शिंदे यांनी कंडक्टरकडे उरलेले ९ रुपये परत मागितले. मात्र, याच कारणावरून कंडक्टरचा संयम सुटला आणि त्याने शिंदे यांना शिवीगाळ करत थेट मारहाण करण्यास सुरुवात केली. या घटनेमुळे बसस्थानक परिसरात काही काळ गोंधळाचे वातावरण निर्माण झाले होते. अखेर उपस्थित नागरिकांनी मध्यस्थी करत परिस्थिती शांत केली. या गैरवर्तणुकीबद्दल माजी उपसरपंच बाळासाहेब गुजर आणि बलुतेदार संघटनेचे अध्यक्ष बाळासाहेब शिरतार यांनी तीव्र नाराजी व्यक्त केली असून, दोषी वाहकावर तत्काळ कारवाई करण्याची मागणी केली आहे. प्रवाशांच्या सुरक्षिततेसाठी आणि सौजन्यासाठी ओळखल्या जाणाऱ्या एसटी सेवेत अशा घटनांमुळे भीतीचे वातावरण आहे.
