Parner News – शहरात ८ व ९ मार्च रोजी आरोग्य सेवेचा अभूतपूर्व सोहळा रंगणार आहे. खासदार नीलेश लंके यांच्या वाढदिवसाचे औचित्य, राष्ट्रवादीचे अध्यक्ष शरद पवार यांच्या संसदीय कारकिर्दीला ६० वर्षे पूर्ण झाल्याचा टप्पा आणि दिवंगत उपमुख्यमंत्री अजित पवार यांच्या स्मृतीप्रित्यर्थ जिल्ह्यातील सर्वात मोठ्या ‘महाआरोग्ययज्ञा’चे आयोजन करण्यात आले आहे. पारनेर ग्रामीण रुग्णालय परिसरात होणाऱ्या या शिबिरात हजारो रुग्णांना मोफत निदान, उपचार व शस्त्रक्रिया सुविधा उपलब्ध होणार आहेत.खासदार नीलेश लंके यांच्या उपस्थितीत पार पडलेल्या पत्रकार परिषदेत बाजार समितीचे सभापती किसनराव रासकर, राष्ट्रवादीचे जिल्हा उपाध्यक्ष अर्जुन भालेकर, नीलेश लंके प्रतिष्ठानचे जिल्हाध्यक्ष कारभारी पोटघन व डॉ. सेलचे जिल्हाध्यक्ष डॉ. बाळासाहेब कावरे यांनी उपक्रमांची सविस्तर माहिती दिली. अर्जुन भालेकर म्हणाले, अजित पवार यांच्या अकाली निधनाने राज्याला मोठा धक्का बसला. त्यांच्या स्मृतीप्रित्यर्थ वाढदिवस साजरा करताना समाजोपयोगी उपक्रम राबविण्याचा निर्णय घेण्यात आला. शरद पवार यांच्या सहा दशकांच्या संसदीय कारकिर्दीत संरक्षण, कृषी, सहकार आणि ग्रामीण विकास क्षेत्रात झालेल्या कार्याला मानवंदना देण्याचाही उद्देश या शिबिरामागे आहे. दिवंगत उपमुख्यमंत्री अजित पवार या शिबिरात राज्यातील विविध नामांकित रुग्णालयांतील एम.डी, एम.एस, डी.एन.बी. तज्ज्ञ डॉक्टर दोन दिवस पूर्णवेळ सेवा देणार आहेत. हृदयरोग, मधुमेह, रक्तदाब, सांधेदुखी, पाठीचे विकार, अपेंडिक्स, हर्निया, मूळव्याध, भगंदर, शरीरातील गाठी, त्वचारोग, दंतरोग, कान-नाक-घसा विकार यांसारख्या आजारांवर तपासणी व शस्त्रक्रिया केल्या जाणार आहेत. नेत्रतपासणी, मोतीबिंदू शस्त्रक्रिया व चष्मावाटपही मोफत होणार आहे. १२ वर्षांपर्यंतच्या हृदयरोगग्रस्त बालकांची मोफत शस्त्रक्रिया करण्याची विशेष व्यवस्था करण्यात आली आहे. महिलांसाठी स्तन व गर्भाशय कर्करोग तपासणी व मार्गदर्शन सुविधा उपलब्ध राहणार आहे.डॉ. बाळासाहेब कावरे यांनी सांगितले की, हे शिबीर केवळ अलोपॅथीपुरते मर्यादित नाही. आयुर्वेद, नॅचरोपॅथी, होमिओपॅथी उपचारांचीही व्यवस्था करण्यात आली आहे. पॅरालिसिसग्रस्त रुग्णांचे पुनर्वसन, व्यायाम मार्गदर्शन व आहार सल्ला दिला जाईल. निदान झालेल्या रुग्णांवर पुढील सहा महिने सातत्याने उपचार व फॉलोअप केला जाईल. प्रतिष्ठानमार्फत त्यावर देखरेख ठेवली जाणार आहे. ‘प्रत्येक कार्यकर्त्याने १० रुग्ण आणावेत’ खासदार नीलेश लंके म्हणाले, “धकाधकीच्या जीवनशैलीमुळे अनेकांना आरोग्य तपासणीसाठी वेळ मिळत नाही. आरोग्य आणि शिक्षण हीच खरी गुंतवणूक आहे. त्यामुळे माझ्या वाढदिवसानिमित्त भेटवस्तू देण्याऐवजी प्रत्येक कार्यकर्त्याने किमान १० रुग्ण शिबिरात आणावेत. हीच माझ्यासाठी खरी भेट असेल.” दिवंगत अजित पवार यांनी अखेरच्या श्वासापर्यंत काम केले. त्यांच्या स्मृती जपण्यासाठी समाजोपयोगी कार्य करण्याची प्रेरणा मिळाल्याचेही त्यांनी नमूद केले. महाआरोग्य शिबीरादरम्यान मान्यवरांची उपस्थिती शिबिराचे उद्घाटन ८ मार्च रोजी सकाळी ९ वाजता माजी आरोग्यमंत्री राजेश टोपे यांच्या अध्यक्षतेखाली होणार आहे. आमदार रोहित पवार, खासदार धैर्यशील मोहिते पाटील, खासदार बजरंग सोनवणे, खासदार भास्कर भगरे, माजी आमदार प्राजक्त तनपुरे, दादाभाऊ कळमकर आदी मान्यवर उपस्थित राहणार आहेत. जिल्हा आरोग्य अधिकारी डॉ. बापूसाहेब नागरगोजे, जिल्हा शल्यचिकित्सक डॉ. संजय घोगरे, तालुका आरोग्य अधिकारी डॉ. प्रकाश कांबळे, ग्रामीण रुग्णालयाचे वैद्यकीय अधीक्षक डॉ. सतीश लोंढे, डॉ. प्रकाश लाळगे यांचे सहकार्य लाभणार आहे.
