नवी दिल्ली : बॉलिवूड अभिनेता आणि राजकारणी परेश रावल त्यांच्या एका विधानामुळे चांगलेच चर्चेत आले आहेत. आगामी विधानसभा निवडणुकीसाठी परेश गुजरातमध्ये प्रचार करताना दिसले. दरम्यान, त्याचा एक व्हिडिओ समोर आला आहे, ज्यावरून त्याच्यावर बरीच टीका होत आहे. परेश रावल भाजपच्या प्रचारासाठी गुजरातमध्ये आले होते. जिथे त्यांनी लोकांना संबोधित करताना असे काही वक्तव्य केले ज्यामुळे लोक संतप्त झाले. परेश रावल यांनी आपल्या भाषणात रोहिंग्या मुस्लिमांचा उल्लेख करून ते अडचणीत आले.

गुजरातच्या वलसाड परिसरात भाजपचा प्रचार करण्यासाठी परेश रावल उभे होते आणि यावेळीस त्यांनी महागाई, बेरोजगारी, बेकायदेशीर विस्थापित लोकांबद्दल वक्तव्य केलं ज्यामुळे ते चर्चेत आले. परेश त्यांच्या भाषणात म्हणाले, “सध्या गॅस सिलेंडर महाग आहे, त्याची किंमत कमी होईल, लोकांना रोजगार मिळेल. गुजरातमधील जनता महागाईचा सामना करेल. पण समजा बाजूच्या घरात रोहिंग्या शरणार्थी किंवा बांगलादेशी आले तर त्या स्वस्त गॅस सिलेंडरचं काय करणार? त्या बंगाली लोकांसाठी मासे शिजवणार का?”

परेश यांच्या या वक्तव्यामुळे सध्या त्यांच्यावर जबरदस्त टीका होताना दिसत आहे. सोशल मीडियावरही त्यांच्या या विधानाचा लोक निषेध करत आहे. एका समाजाला टार्गेट करून त्यांच्यावर अशी जहरी टीका होत असल्याचे सोशल मीडियावर म्हटले जात आहे. सोशल मीडियावर लोक व्यक्त होत असल्याने याविषयी परेश रावल यांनी यावर स्पष्टीकरण दिले आहे.

Gas cylinder will become cheaper again, inflation will go up & down but what if Rohingyas start living next to you? Gujarat people can tolerate inflation but not this … Way they deliver verbal abuses. A person among them needs to wear diaper on his mouth: Paresh Rawal in Valsad pic.twitter.com/25iruyNhSa

— DeshGujarat (@DeshGujarat) November 29, 2022

परेश यांनी ट्वीट करत त्यांनी बाजू मांडली आहे. ते म्हणतात, “मासे खाणं हा मुद्दा अजिबात नाही. गुजराती लोकसुद्धा मासे शिजवतात आणि खातात. पण मी बंगाली फक्त अवैध बांगलादेशी आणि रोहिंग्या यांनाच संबोधून म्हणालो आहे. तरी मी तुमचं मन आणि भावना दुखावल्या असतील तर त्याबद्दल मी माफी मागतो.”

परेश यांनी माफी मागूनही प्रकरण अजूनही शांत झालेले नाही. पश्चिम बंगालच्या मार्क्सवादी कम्युनिस्ट पार्टीचे नेता मुहम्मद सलीम यांनी परेश रावल यांच्याविरोधात कलकत्ताच्या तलतला येथील पोलिस चौकीत तक्रार दाखल केली आहे. परेश रावल हे त्यांच्या भाषणातून दंगे भडकवण्याचे काम करत आहेत शिवाय बंगाली लोकांबद्दलची प्रतिमा मलिन करायचा प्रयत्न करत आहेत असे सलीम यांनी या तक्रारीत नमूद केले आहे.