Parbhani ZP Election News : जिल्हा परिषद निवडणुकीच्या रणधुमाळीत परभणी जिल्ह्यात शिवसेना उद्धव बाळासाहेब ठाकरे पक्षाला मोठा धक्का बसला आहे. माजी मंत्री रावसाहेब जामकर यांचे नातू आणि शिवसेना UBT चे स्थानिक नेते संग्राम जामकर यांनी आज राष्ट्रवादी काँग्रेस पक्षात प्रवेश केला. आमदार राजेश विटेकर यांच्या उपस्थितीत हा पक्षप्रवेश पार पडला आहे.

उद्धव ठाकरे यांच्या पक्षाला जय महाराष्ट्र केल्यानंतर संग्राम जामकर आता जांब जिल्हा परिषद गटातून राष्ट्रवादी काँग्रेसच्या वतीने निवडणूक लढवणार आहेत. त्यांच्या या निर्णयामुळे परभणी जिल्ह्यातील राजकीय समीकरणे बदलण्याची शक्यता व्यक्त केली जात आहे.

नुकत्याच झालेल्या महापालिका निवडणुकीत परभणीत शिवसेना उद्धव बाळासाहेब ठाकरे पक्षाने सर्वाधिक २५ जागा जिंकत मोठा पक्ष म्हणून यश मिळवले होते. महापालिकेत शिवसेना-काँग्रेस आघाडीची सत्ता स्थापन होणार असून महापौरपदही या आघाडीकडे जाणार आहे. असे असताना जिल्हा परिषद निवडणुकीच्या पार्श्वभूमीवर संग्राम जामकर यांच्या पक्षांतरामुळे शिवसेना UBT ला हा मोठा धक्का मानला जात आहे.

दरम्यान, राज्यात ठिकठिकाणी शिवसेना UBT मधून गळतीचे चित्र दिसत आहे. छत्रपती संभाजीनगर ग्रामीणमध्ये जिल्हाप्रमुखाने एकनाथ शिंदे यांच्या शिवसेनेत प्रवेश केला असून, परभणीतही पक्षांतर्गत हालचालींना वेग आला आहे.

जिल्ह्याच्या राजकारणात जामकर कुटुंबाचा दबदबा राहिला आहे. माजी मंत्री रावसाहेब जामकर यांनी सरपंच पदापासून ते मंत्रीपदापर्यंतचा यशस्वी राजकीय प्रवास केला. त्यांच्या निवृत्तीनंतर अ‍ॅड. बाळासाहेब जामकर आणि विजय जामकर हे राजकारणात सक्रिय झाले. अ‍ॅड. बाळासाहेब जामकर यांनी जिल्हा परिषद उपाध्यक्षपद भूषवले, तर विजय जामकर यांनी नगरपालिका आणि महापालिकेत काम केले.

यानंतर जामकर कुटुंबाची तिसरी पिढी राजकारणात उतरली. बदलत्या राजकीय परिस्थितीचा अंदाज घेत संग्राम जामकर यांनी सुरुवातीला शिवसेना उद्धव बाळासाहेब ठाकरे पक्षात प्रवेश केला होता. मागील जिल्हा परिषद निवडणुकीत पराभव पत्करावा लागला असला, तरी ते सातत्याने जनतेच्या संपर्कात राहिले.

आता बदलती राजकीय समीकरणे लक्षात घेता संग्राम जामकर यांनी राष्ट्रवादी काँग्रेस पक्षात प्रवेश करण्याचा निर्णय घेतल्याने परभणी जिल्ह्यातील राजकारणात नव्या घडामोडींना वेग येण्याची शक्यता आहे.