Parbhani – तिसरीही मुलगीच झाल्याच्या रागातून संतापलेल्या पतीने चक्क पेट्रोल टाकून पत्नीला जिवंत जाळल्याचा धक्कादायक प्रकार परभणीत घडला आहे. या धक्कादायक घटनेचे सीसीटीव्ही फुटेज आता समोर आले असून सर्वत्र खळबळ उडाली आहे. दरम्यान, जीव वाचविण्यासाठी धावताना घरासह दोन दुकाने जळून खाक झाल्याची प्राथमिक माहिती समजते. याबाबत मिळालेल्या माहितीनुसार, तिसरीही मुलगीच झाल्यामुळे पती उठता-बसता पत्नीला शिवीगाळ, मारहाण करून तिच्याशी भांडायचा. गुरुवारी रात्री आठच्या दरम्यान पतीने कहरच केला. यात चक्क टोकाचे पाऊल उचलत पत्नी मैना कुंडलिक काळे हिच्या अंगावर पेट्रोल टाकून पेटवून दिले. ही घटना परभणीच्या गंगाखेड नाका परिसरात घडली आहे. घटनेनंतर पत्नीला परभणी जिल्हा रुग्णालयात उपचारासाठी दाखल केले असता उपचारादरम्यान तिचा मृत्यू झाला आहे. दरम्यान मृत महिला मैना काळे या पेटलेल्या अवस्थेत घराबाहेर पडताना आणि दुकानात शिरतानाचे धक्कादायक असे सीसीटीव्ही फुटेज व्हायरल झाले आहेत. एवढ्या क्रूरपणे आपल्या पत्नीचा जीव घेणा-या कुंडलिक काळेविषयी सध्या प्रचंड संताप व्यक्त केला जात आहे. यातील क्रूर पती कुंडलिक काळे याच्या विरोधात कोतवाली पोलिसांत गुन्हा दाखल करण्यात आला आहे.
