मुंबई : भाजपा नेत्या पंकजा मुंडे आणि विधानसभा विरोधी पक्षनेते देवेंद्र फडणवीस यांच्यात मागील काही दिवसांपासून तणाव सुरु असल्याचे आख्या महाराष्ट्राने पहिले होते. मात्र त्यांच्यातील हाच दुरावा आणि ताण कमी झाल्याचे पाहायला मिळत आहे. याचेच चित्र एका जाहीर सभेत दिसून आले. पंकजा मुंडे यांनी देवेंद्र फडणवीस यांचे जाहीरपणे कौतुक केल्याचे समोर आले आहे. आष्टीत नगरपंचायत निवडणुकीच्या प्रचारसभेत बोलताना पंकजा मुंडे यांनी देवेंद्र फडणवीसांकडून संयम कसा राखावा हे शिकण्यासारखं असल्याचे म्हटले आहे. दरम्यान, त्यांनी केलेल्या या कौतुकाची राजकीय वर्तुळात चांगलीच चर्चा सुरु झाली आहे.प्रचार सभेत बोलताना पंकजा मुंडे यांनी फडणवीसांच्या संयमाचं कौतुक करताना सांगितलं की, “काही लोक फडणवीसांकडे जागा वाटपासाठी गेले होते. ५०-५० टक्के जागा मागत होते. त्यावेळी फडणवीसांनी संयम दाखवला. त्यांच्याकडून संयम शिकण्यासारखा आहे”. पुढे बोलताना त्यांनी सांगितलं की, “यावेळी मी एक फॉर्म्युला दिला. मी म्हटलं ५० टक्के जागा दिल्या तर समोरच्याच विजय होत असतो. एकाला आष्टीत आणि दुसऱ्याला पाटोद्यात उभं करा. शिरुरमध्येही युती करा, असं मी सुचवलं”. विशेष म्हणजे काशी विश्वनाथ कॉरिडोरच्या लोकार्पण सोहळ्याच्या कार्यक्रमातही देवेंद्र फडणवीस आणि पंकजा मुंडे एकत्र होते. यावेळी दोघेही मनमोकळेपणाने गप्पा मारत होते. त्यानंतर पंकजा मुंडेंनी फडणवीसांच्या संयमीपणाचे कौतुक केले असल्याने त्यांच्यातील अंतर कमी होत असल्याचे बोलले जात आहे. “मी गोपीनाथ मुंडेंची कन्या आहे. त्यांनी मला बेरजेचे राजकारण शिकविले. मात्र येथे बीड जिल्ह्यात गुणाकाराचे राजकारण शिकले. बीड जिल्ह्याचे रस्ते बघता बघता मला मणक्याचा आजार झाला,” असे सांगत त्यांनी टीका केली. “दोन वर्षात एखादा रस्ता मिळालेला नाही. दोन वर्षात कोणताही निधी मिळाली नाही. नवीन कामाचा एखादा नारळ फुटला का? तुमच्या लेकीने दिलेल्या बजेटच्या कामाचे नारळ फक्त फुटले आहेत. पण तुम्ही काळजी करु नका. लोक म्हणतील भाजपाचं नाही तर आघाडीचं सरकार आहे. पण आघाडीचं सरकार असलं तरी केंद्रात तुमची लेक हक्काने निधी आणण्यासाठी बसली आहे. निधीची कमतरता कमी पडू देणार नाही,” असे पंकजा मुंडेंनी यावेळी सांगितले.
