पारळी (जि. बीड) : “आजचा दिवस आमच्यासाठी सर्वकाही उध्वस्त करणारा आहे… मुंडे साहेब आज असते तर देशाच्या राजकारणात मोठी भूमिका बजावत असते,” अशा भावनिक शब्दांत मंत्री पंकजा मुंडे यांनी वडिलांच्या आठवणींना उजाळा दिला. दिवंगत नेते गोपीनाथ मुंडे यांच्या 11व्या स्मृतिदिनी गोपीनाथ गडावर आयोजित कार्यक्रमात त्या बोलत होत्या.

या स्मृतिदिनानिमित्त पंकजा मुंडे यांनी आपल्या कुटुंबासह गडावर जाऊन अभिवादन केले. यावेळी रक्तदान शिबिर, आरोग्य तपासणी शिबिर, पशुसंवर्धन स्टॉल अशा सामाजिक उपक्रमांचे आयोजन करण्यात आले होते. पावसामुळे कार्यक्रमाचे स्वरूप मर्यादित ठेवले असले तरी, उपस्थित जनसमुदायाने मुंडे साहेबांच्या कार्याला सलाम केला.

रामटेक बंगला मिळाल्यानंतर मिळालेल्या समाधानाचा उल्लेख करत पंकजा मुंडे म्हणाल्या, “रामटेक बंगला माझ्यासाठी पारितोषिकासारखा आहे, त्यामागे माझ्या भावना जोडलेल्या आहेत.” त्यांनी सांगितले की, मुंडे साहेबांच्या विचारांना योजनांच्या रूपात पुढे नेण्याचे कार्य सुरु आहे.

यावेळी त्यांनी स्पष्ट केले की, “ऊसतोड कामगार महामंडळ” यांच्या संदर्भात असमाधान असून, कामगारांच्या मानधनात वाढ करण्यात आली आहे. धनंजय मुंडे यांच्या आरोपांबाबत विचारले असता, “अंजली दमानिया यांची चौकशी होणार” या विषयावर प्रतिक्रिया देताना त्यांनी सांगितले की, “मला या चौकशीविषयी अद्याप काही माहिती नाही.”

या कार्यक्रमाचे आणखी एक विशेष वैशिष्ट्य म्हणजे धनंजय मुंडे यांची उपस्थिती. 11 वर्षांनंतर पंकजा आणि धनंजय मुंडे एकत्र गोपीनाथ गडावर दिसणार असल्याने, उपस्थितांमध्ये उत्सुकता आणि भावनिक वातावरण निर्माण झाले होते. Pankaja Munde |

फोटो प्रदर्शन, स्मरण सभा आणि सामाजिक उपक्रमांच्या माध्यमातून गोपीनाथ मुंडे यांच्या कार्याचा गौरव करण्यात आला. पंकजा मुंडे म्हणाल्या, “मी वाईट काळाला शिकण्याची संधी मानते आणि आजही जी जबाबदारी आहे ती पूर्ण ताकदीने पार पाडते.”