चंदीगड – आम आदमी पार्टीने हरियाणा विधानसभा निवडणूक २०२४ साठी आपल्या उमेदवारांची चौथी यादी जाहीर केली आहे. ‘आप’च्या चौथ्या यादीत एकूण 21 उमेदवारांची नावे जाहीर करण्यात आली आहेत. ‘आप’ने जुलाना विधानसभा मतदारसंघातून महिला कुस्तीपटू कविता दलाल यांना तिकीट दिले आहे.

विनेश फोगट या आधीच जुलाना येथून काँग्रेसच्या तिकिटावर निवडणूक लढवत आहेत. मात्र, आम आदमी पक्षाने विनेश फोगट यांच्यासमोर कविता यांना उभे करून जुलाना विधानसभेची जागा अधिक रंजक बनवली आहे.

कोण आहेत कविता दलाल?

कविता दलाल यांनी २०२२ मध्ये आम आदमी पक्षात प्रवेश केला. आता ‘आप’ने त्यांना जुलाना विधानसभा मतदारसंघातून उमेदवारी दिली आहे. आपच्या उमेदवार आणि महिला कुस्तीपटू कविता दलाल ही देशातील पहिली WWE (वर्ल्ड रेसलिंग एंटरटेनमेंट) कुस्तीपटू आहे. कविता यांचा जन्म हरियाणातील जिंद जिल्ह्यातील माळवी या गावात झाला. तर बिजवाडा गावात राहणाऱ्या गौरव तोमरसोबत तिचे लग्न झाले आहे.

पॉवर गेम वेट लिफ्टिंगमधून तीने करिअरची सुरुवात केली. त्यानंतर, तिने तिच्या उत्कृष्ट क्रीडा कामगिरीच्या जोरावर WWE कुस्तीमध्ये स्वत:ची वेगळी ओळख निर्माण करण्यात यशस्वी ठरली. त्याचवेळी कविता आता राजकारणातही योगदान देण्यास तयार आहे.

विनेशसाठी आव्हान –

जुलाना येथून कविता दलाल यांना आम आदमी पक्षाचे तिकीट मिळाल्याने विनेश फोगट यांच्यासाठी अडचणी निर्माण झाल्या आहेत. आता दोन पैलवानांमध्ये निवडणूक लढत पहायला मिळणार आहे.

सुरुवातीला आप आणि काँग्रेस यांच्यात युतीबाबत चर्चा सुरू होती. मात्र, जागावाटपावरून बोलणी फिस्कटली. त्यामुळे आप आणि काँग्रेस या दोघांनीही आपापले उमेदवार जाहीर करण्यास सुरुवात केली. चौथ्या यादीनंतर आता आम आदमी पक्षाने 61 जागांवर आपले उमेदवार जाहीर केले आहेत.