Pakistan Train Hijack | पाकिस्तानातील बलुचिस्तानमध्ये बलुच लिबरेशन आर्मी (BLA) ने जाफर एक्सप्रेस ट्रेन हायजॅक केल्याची घटना समोर आली होती. दहशतवाद्यांनी शेकडो पाकिस्तानी नागरिकांना ओलीस ठेवले आहे. आता या हायजॅकशी संबंधित मोठी माहिती समोर आली आहे.

पाक सैन्याने दावा केला आहे की, ओलीस ठेवण्यात आलेल्या नागरिकांपैकी 108 जणांची सुटका करण्यात आली आहे. तर बीएलएने दावा केला आहे की 30 हून अधिक पाकिस्तानी सैनिक मारले गेले आहेत. आता बीएलएने पाकिस्तानी तुरुंगात कैद असलेल्या बलुच कैद्यांच्या सुटकेसाठी शाहबाज शरीफ सरकारला 48 तासांचा अल्टिमेटम दिला आहे.

या घडामोडींवर अद्याप पाकिस्तानी लष्कर-पोलिसांनी कोणतीही अधिकृत प्रतिक्रिया दिलेली नाही. मागील जवळपास 10 तासांपासून पाक सैन्य आणि दहशतवाद्यांमध्ये संघर्ष सुरू आहे. रिपोर्टनुसार, सुरक्षा दलांनी 13 दहशतवाद्यांना आतापर्यंत ठार केले आहे.

दरम्यान, बलुच लिबरेशन आर्मीकडून क्वेट्टाहून निघालेल्या जाफर एक्सप्रेसवर हल्ला करण्यात आला होता. बोगदा क्रमांक 8 जवळ दहशतवाद्यांनी ट्रेनला वेढले होते. एका दुर्गम ठिकाणी ट्रेनला रुळावरून उतरवत दहशतवाद्यांनी ट्रेन ताब्यात घेतल्याचा दावा केला.

बलुच लिबरेशन आर्मी (BLA) कोण आहे?

बलुच लिबरेशन आर्मी ही एक बंडखोर आणि सशस्त्र फुटीरतावादी संघटना आहे, जी पाकिस्तानच्या बलुचिस्तान प्रांतात दीर्घकाळापासून सक्रिय आहे. अफगाणिस्तानला लागून असलेल्या या प्रांतातील लोकांचा असा विश्वास आहे की त्यांना संसाधनांचा लाभ मिळत नाही. बलुचिस्तानचे स्वातंत्र्य आणि त्याच्या संसाधनांवर बलुच लोकांचे अधिकार स्थापित केले जावेत.

ही एक दहशतवादी संघटना मानली जाते आणि प्रामुख्याने पाकिस्तानी लष्कर, सरकारी आस्थापने आणि चीनी गुंतवणूक प्रकल्पांवर (विशेषतः CPEC) हल्ले करते. 2006 मध्येच पाकिस्तानने बीएलएला दहशतवादी गट घोषित केले होते. याशिवाय बलुच रिपब्लिकन आर्मी आणि लष्कर-ए-बलुचिस्तानसारखे अनेक गट आहेत, जे बलुचिस्तानच्या स्वातंत्र्याची मागणी करत आहेत.

काय आहेत BLAच्या मागण्या?

बीएलए अनेक दिवसांपासून बलुचिस्तानच्या स्वातंत्र्याची मागणी करत आहे. बलुचिस्तानमध्ये पाकिस्तानच्या कोणत्याही सुरक्षा एजन्सीचे लोक नसावेत, अशी बीएलएची मागणी आहे. तसेच चीनसोबत सुरू असलेले सर्व सीपीईसी प्रकल्पही हटवण्याची मागणी आहे.