Pakistan News : पाकिस्तानमधील (Pakistan News) बलुचिस्तानमध्ये सुरक्षा रक्षकांनी राबवलेल्या वेगवेगळ्या दहथवादविरोधी मोहिमांमध्ये तब्बल 92 दहशतवाद्यांचा खात्मा झाला आहे. या मोहिमेदरम्यान पाक लष्कराचे 15 सैनिकही मारले गेले आहेत, असे पाक लष्कराच्यावतीने आज सांगण्यात आले. दहशतवाद्यांनी बलुचिस्तान प्रांतातील क्वेट्टा, मास्तंग, नुश्की, दालबंदिन, खरन, पंजगर, टंप, ग्वादर आणि पास्नी या भागात दहशतवादी कारवायांच्या माध्यमातून शांततेचा भंग करण्याचा प्रयत्न दहशतवाद्यांनी केला होता. सुरक्षा दल आणि कायद्याची अंमलबजावणी करणाऱ्या संस्थांनी दहशतवाद्यांविरोधात यशस्वी मोहिम राबवली आणि दहशतवाद्यांचा कट उधळून लावला. लष्कराच्या वेगवेगळ्या मोहिमांमध्ये ९२ दहशतवादी मारले गेले आहेत. यामध्ये ३ आत्मघातकी हल्लेखोरांचाही समावेश होता. दहशतवाद्यांनी महिला, मुले, ज्येष्ठ नागरिक आणि मजूरांसह एकूण १८ सामान्य नागरिकांनाही लक्ष्य केले होते. काही चकमकींदरम्यान १५ सैनिक देखील मारले गेले आहेत, असे लष्कराने आपल्या निवेदनात म्हटले आहे. शनिवारी पंजगर आणि हरनाय जिल्ह्यातल्या कारवाईदरम्यान तेहरीक-ए-तालिबान पाकिस्तान या दहशतवादी संघटनेचे ४१ दहशतवादी मारले गेले होते. गेल्या दोन दिवसात बलुचिस्तानच्या वेगवेगळ्या भागात करण्यात आलेल्या दहशतवादविरोधी मोहिमेदरम्यान तब्बल १३३ दहशतवादी मारले गेले आहेत, असे लष्कराने म्हटले आहे.
