Pakistan Afghanistan War 2025 : पाकिस्तान आणि अफगानिस्तान यांच्यातील तणाव पुन्हा एकदा वाढला आहे. अलीकडेच पाकिस्तानी सैन्याने अफगानिस्तानातील काही भागांवर हवाई हल्ले केले, ज्यामध्ये तीन अफगाणी क्रिकेटपटूंचा मृत्यू झाला. या घटनेने संपूर्ण क्रिकेट विश्वात शोककळा पसरली असून, अनेक दिग्गजांनी या हल्ल्याचा तीव्र निषेध केला आहे. अफगानिस्तान क्रिकेट मंडळानेही एक निवेदन जारी करत या हल्ल्याची निंदा केली आणि पाकिस्तानसोबत नियोजित तिरंगी क्रिकेट मालिकेत सहभागी न होण्याचा निर्णय घेतला.

आयसीसीचे निवेदन दुर्दैवी, पाकिस्तानचा आरोप –

आंतरराष्ट्रीय क्रिकेट परिषदेने (आयसीसी) या हल्ल्याला दुर्दैवी ठरवत अफगाणी क्रिकेटपटूंच्या मृत्यूबद्दल शोक व्यक्त केला. मात्र, हे निवेदन पाकिस्तान सरकारला रुचले नाही. पाकिस्तानचे माहितीमंत्री अता तरार यांनी रविवारी एक निवेदन जारी करत आयसीसीवर पक्षपाताचा आरोप केला. त्यांनी म्हटले की, आयसीसीने अफगानिस्तान क्रिकेट मंडळाच्या दाव्यांची स्वतंत्रपणे पडताळणी न करता एकतर्फी निवेदन जारी केले.

अता तरार म्हणाले, “आयसीसीने कोणतीही चौकशी न करता पाकिस्तानला दोषी ठरवण्याचा प्रयत्न केला, जरी त्यांच्या निवेदनात पाकिस्तानचे नाव स्पष्टपणे नमूद केले नसले तरी.” त्यांनी आयसीसीच्या या वक्तव्याचा तीव्र निषेध केला आणि अशा संस्थेने राजकीय वादात पडू नये, तसेच तथ्यांची पडताळणी करूनच पावले उचलावीत, असे मत व्यक्त केले.

हेही वाचा – IND vs AUS : ऑस्ट्रेलियाचा ऐतिहासिक विजय! भारताला धूळ चारत ऑप्टसवर उघडलं विजयाच खातं

पाकिस्तान स्वतः दहशतवादाचा बळी – तरार

माहितीमंत्र्यांनी पुढे सांगितले की, पाकिस्तान स्वतः दहशतवादाचा सर्वात मोठा बळी आहे आणि देशाने अनेक वर्षांपासून दहशतवादाविरुद्ध लढा दिला आहे. त्यांनी आयसीसीचा दृष्टिकोन निष्पक्ष नसल्याचा आरोप करत, यामुळे आयसीसीच्या स्वायत्ततेवर गंभीर प्रश्नचिन्ह उपस्थित होत असल्याचे म्हटले. तरार यांनी असा दावाही केला की, आयसीसीच्या निवेदनानंतर काही तासांतच आयसीसीचे अध्यक्ष जय शाह यांनी त्यांच्या सोशल मीडिया खात्यावर तेच शब्द पुनरुच्चारले, ज्यामुळे आयसीसी कोणाच्यातरी प्रभावाखाली काम करत असल्याचे दिसते.

हेही वाचा – IND vs AUS : शुबमन गिलने पहिल्याच सामन्यात रचला इतिहास! एमएस धोनीचा मोडला खास विक्रम

अफगानिस्तान-पाकिस्तान क्रिकेटमध्ये वाद पेटला –

अफगानिस्तान क्रिकेट मंडळाने तिरंगी मालिकेतून माघार घेण्याच्या निर्णयामुळे दोन्ही देशांमधील क्रिकेट संबंध आणखी तणावपूर्ण झाले आहेत. अफगान मंडळाने खेळाडूंच्या सुरक्षेला प्राधान्य देण्याचे कारण दिले आहे. दुसरीकडे, पाकिस्तान सरकारचे मत आहे की, या संपूर्ण प्रकरणाला अनावश्यकपणे राजकीय रंग दिला जात आहे. पाकिस्तानने आयसीसीला त्यांचे निवेदन मागे घेण्याची आणि तथ्यांची स्वतंत्र चौकशी करण्याची मागणी केली आहे. तर अफगानिस्तान क्रिकेट मंडळ आपल्या भूमिकेवर ठाम आहे आणि त्यांनी म्हटले आहे, “आमच्या खेळाडूंच्या बलिदानाला आम्ही व्यर्थ जाऊ देणार नाही.”