Pakistan Bomb Blast: होळीच्या दिवशी पाकिस्तानमध्ये बॉम्बस्फोट झाला आहे. उत्तर-पश्चिम पाकिस्तानातील खैबर पख्तुनख्वा प्रांतातील एका मशिदीत बॉम्बस्फोट झाला आहे. शुक्रवारी अनेक लोक मशिदीत नमाज पठणासाठी जमले होते. यावेळी मशिदीत नमाजाच्या वेळी स्फोट झाला. या स्फोटात एका ज्येष्ठ मौलवीसह चार जण जखमी झाले आहेत. पाकिस्तान पोलिसांनी ही माहिती दिली आहे. जिल्हा पोलीस अधिकारी आसिफ बहादर यांनी सांगितले की, दक्षिण वझिरीस्तानमधील मौलाना अब्दुल अजीज मशिदीत स्फोट झाला आहे.

डेली डॉनमध्ये प्रसिद्ध झालेल्या वृत्तानुसार, दक्षिण वझिरीस्तानमध्ये नमाजदरम्यान एका मशिदीत स्फोट झाला आहे. या हल्ल्यात जमियत उलेमा-ए-इस्लाम (JUI) चे जिल्हा प्रमुख अब्दुल्ला नदीम गंभीर जखमी झाले आहेत. यासह अन्य तीन जण जखमी झाले आहेत.

मशिदीच्या स्टेजवर बॉम्ब बसवण्यात आला होता –

मीडिया रिपोर्ट्सनुसार, मशिदीच्या स्टेजवर बॉम्ब बसवण्यात आला होता. स्थानिक वेळेनुसार दुपारी 1.45 वाजता हा स्फोट झाला. सर्व जखमींना रुग्णालयात दाखल करण्यात आले आहे. त्याच्यावर उपचार सुरू आहेत. मशिदीच्या व्यासपीठावर एक सुधारित स्फोटक यंत्र (आयईडी) लावण्यात आले होते. त्याचा शुक्रवारच्या नमाजच्या वेळी बॉम्बस्फोट झाला. पोलिसांनी दिलेल्या माहितीनुसार, जखमींची ओळख पटली आहे. यामध्ये रहमानउल्ला, मुल्ला नूर आणि शाह बेहरान यांचा समावेश आहे. पोलिसांनी स्फोटाच्या ठिकाणी तपास सुरू केल्याचे सांगितले. पुरावे गोळा केले जात आहेत. सुरक्षा यंत्रणांनी या घटनेमागील संभाव्य हल्लेखोरांचा शोध सुरू केला आहे.

चॅम्पियन्स ट्रॉफीदरम्यान झाले होते स्फोट –

याआधी चॅम्पियन्स ट्रॉफी 2025 दरम्यान बॉम्बस्फोट झाले होते. उत्तर-पश्चिम पाकिस्तानमधील एका मशिदीत बॉम्बस्फोट झाला. या स्फोटात 5 जणांचा मृत्यू झाला होता. तर डझनभर लोक जखमी झाले. उत्तर-पश्चिम पाकिस्तानातील खैबर पख्तुनख्वा प्रांतातील अकोरा खटक जिल्ह्यात हा स्फोट झाला होता.