मुंबई : महाराष्ट्रातील अतिवृष्टी आणि पूरपरिस्थितीमुळे मराठवाड्यातील शेतकरी हवालपावलावर असताना, पैठण तालुक्यातील एका साध्या शेतकऱ्याने ‘कौन बनेगा करोडपती’ (KBC 17) मध्ये कमाल करून सर्वांना प्रेरणा दिली आहे. छत्रपती संभाजीनगर जिल्ह्यातील पैठण तालुक्यातील कैलास रामभाऊ कुंटेवाड (Kailas Kuntewad) यांनी अमिताभ बच्चन यांच्या या लोकप्रिय शोमध्ये एकही लाईफलाइन न वापरता तब्बल ५० लाख रुपये जिंकले.

सोमवारी (३० सप्टेंबर) प्रदर्शित झालेल्या भागात कैलास यांची ही धक्कादायक कामगिरी दाखवण्यात आली. त्यांनी १४ प्रश्नांची उत्तरं बिनचूक दिली, पण १ कोटी रुपयांच्या १५ व्या प्रश्नासाठी गेम सोडण्याचा निर्णय घेतला. हा प्रश्न तुम्हाला माहीत आहे का? चला, जाणून घेऊया!

कैलास कुंटेवाड यांची धडाकेबाज सुरुवात

कैलास हे पैठण तालुक्यातील एक साधा शेतकरी आहेत. महिन्याला केवळ ३-४ हजार रुपयांची कमाई करणाऱ्या या कुटुंबातील कैलास यांना क्रिकेटचं प्रचंड वेड आहे. लहानपणापासून राष्ट्रीय क्रिकेट संघात खेळण्याचं स्वप्न पाहणारे कैलास हे घरची गरीबी, ग्रामीण जीवन आणि शेतीच्या जबाबदाऱ्यांमुळे हे स्वप्न पूर्ण करू शकले नाहीत. आता त्यांनी हे स्वप्न आपल्या दोन मुलांद्वारे पूर्ण करण्याचा निर्धार केला असून, त्यांना क्रिकेट अकॅडमीत प्रशिक्षण देण्यास सुरुवात केली आहे. या जिंकलेल्या रकमेतून ते मुलांच्या क्रिकेट करिअरला चालना देतील, असा विश्वास कैलास यांनी व्यक्त केला.

KBC च्या हॉट सीटवर बसलेल्या कैलास यांनी पहिल्यापासूनच जबरदस्त सुरुवात केली. त्यांनी पहिले १० प्रश्न बिनचूक सोडवले आणि साडेसात लाखांच्या ११ व्या प्रश्नाचंही उत्तर नेमकं दिलं. १२ व्या प्रश्नावेळी थोडं संभ्रमित झाल्याने त्यांनी एकमेव लाईफलाइन ऑडियन्स पोल वापरली. प्रेक्षकांच्या मदतीने उत्तर बरोबर आल्याने ही लाईफलाइन पुन्हा सक्रिय झाली. त्यानंतर १३ व्या आणि ५० लाखांच्या १४ व्या प्रश्नाचंही उत्तर त्यांनी स्वतःच्या ज्ञानावर नेमकं दिलं. अमिताभ बच्चन यांनी कैलास यांच्या या कामगिरीचे कौतुक करत, “भल्याभल्यांना न जमणारी गोष्ट तू करून दाखवलीस!” असं म्हटलं.

१ कोटीचा प्रश्न, कैलास यांनी का सोडला गेम?

अमिताभ बच्चन यांनी कैलास यांना १ कोटी रुपयांसाठी १५ वा प्रश्न विचारला. “अमेरिकन कोलोनायझेशन सोसायटीने मुक्त झालेल्या गुलामांना आफ्रिकेत पुनर्वसन देण्याच्या कार्यामुळे कोणता देश निर्माण झाला?”
A. लायबेरिया
B. सिएरा लियोन
C. घाना
D. नायजेरिया

कैलास यांना हा प्रश्न कठीण वाटला. त्यांनी प्रथम ‘संकेत सूचक’ लाईफलाइन वापरली, ज्यातून एक हिंट मिळाली. मात्र, तरीही संभ्रम कायम राहिला. नंतर त्यांनी ‘५०-५०’ लाईफलाइन वापरली, ज्यामुळे दोन चुकीचे पर्याय गायब झाले. उरलेल्या A आणि B पर्यायांमध्येही कैलास यांना शंका होती. जोखीम घेण्याऐवजी त्यांनी ५० लाखांच्या सुरक्षित रकमेसह गेम क्विट करण्याचा निर्णय घेतला.

योग्य उत्तर: A. लायबेरिया (१८४७ मध्ये अमेरिकन कोलोनायझेशन सोसायटीच्या प्रयत्नांमुळे लायबेरिया देशाची स्थापना झाली, जिथे मुक्त झालेल्या गुलामांना वसाहत करण्यात आली).