Ozar News : अष्टविनायक तीर्थक्षेत्र म्हणून अवघ्या महाराष्ट्राला परिचित असलेल्या श्री क्षेत्र ओझरच्या (Ozar News) भूमीत गेल्या तीन दिवसांपासून एक वेगळाच भक्तीचा कल्लोळ पाहायला मिळाला.

वेदमंत्रांचा निनाद, सुगंधी धूर आणि भाविकांची अथांग गर्दी… निमित्त होतं ते नव्याने आकारास आलेल्या भव्य महादेव मंदिराच्या प्राणप्रतिष्ठा व कलशारोहण सोहळ्याचं! महंत पीरयोगी अजयनाथजी यांच्या पावन हस्ते अत्यंत गूढ, पारंपरिक आणि विधीवत पद्धतीने महादेवाच्या मूर्तीची प्रतिष्ठापना करण्यात आली.

हा सोहळा केवळ औपचारिकता नव्हता, तर तीन दिवस चाललेल्या एका मोठ्या आध्यात्मिक अनुष्ठानाचा महाकुंभ ठरला. तेजोतारण, रुद्राभिषेक, चौरंग पूजन, तब्बल ८१ कलशांचे विधी, गूढ शय्या विधी, महाहवन, मंगलाष्टक, कळसारोहण आणि शेवटी पूर्णाहुती अशा एकामागून एक पार पडलेल्या विधींनी संपूर्ण परिसर मंत्रमुग्ध करून टाकला. मयूर कुलकर्णी आणि विघ्नहराचे पुजारी जयेश जोशी यांच्या पौरोहित्यातून उमटलेल्या वेदमंत्रांनी वातावरण भक्तिरसात न्हाऊन निघाले होते.

या ऐतिहासिक क्षणाचे साक्षीदार होण्यासाठी (Ozar News) भाजपचे ज्येष्ठ नेते किरीट सोमय्या, विघ्नहर साखर कारखान्याचे चेअरमन सत्यशील शेरकर, संतोष नाना खैरे आणि जिल्हा परिषद सदस्या छायाताई तांबे यांसारख्या मातब्बर राजकीय व सामाजिक चेहऱ्यांनी विशेष हजेरी लावली.

मंदिराचे वास्तुरूपही सर्वांच्या डोळ्यांचे पारणे फेडणारे ठरले. आर्किटेक्ट ब्रह्मे अँड घोडेकर असोसिएशनचे वास्तू कौशल्य, शिंदे कॉन्ट्रॅक्टरचे आरसीसी काम आणि तिडके बंडू व टेम्पल कंपनीचे नक्षीदार दगडी बांधकाम यामुळे या मंदिराला एक अलौकिक तेज लाभले आहे. वलीबाबा लाईटची नयनरम्य रोषणाई आणि विजय यादव यांनी केलेली फुलांची आकर्षक सजावट मंदिराचे सौंदर्य कैक पटीने वाढवत होती.

श्री विघ्नहर गणपती (Ozar News) देवस्थान ट्रस्टचे अध्यक्ष बाळकृष्ण कवडे यांच्या नेतृत्वाखाली माजी अध्यक्ष गणेश कवडे, उपाध्यक्ष तुषार कवडे, सचिव सुनिल घेगडे, खजिनदार दत्तात्रय कवडे यांच्यासह संपूर्ण विश्वस्त मंडळाने या महासोहळ्याचे नेटके नियोजन केले.

ओझरच्या सरपंच राजश्री कवडे, ओझर नं. २ च्या सरपंच तारामती कर्डक, ग्रामविकास व तंटामुक्त समित्यांचे पदाधिकारी या वेळी एकदिलाने उपस्थित होते. तिन्ही दिवस आचारी राजू येधे यांच्या सहकार्याने भाविकांसाठी अखंड महाप्रसादाची सोय करण्यात आली होती. उपस्थित मान्यवरांचा ट्रस्टच्या वतीने सन्मान करण्यात आला. श्रद्धा, सेवा आणि वास्तुसौंदर्याचा हा मिलाफ ओझरच्या वैभवात एक नवा सुवर्ण अध्याय लिहून गेला.