Ramalinga Reddy : कर्नाटकचे मुख्यमंत्री म्हणून डी. के. शिवकुमार यांनी पदभार स्वीकारल्यानंतर अवघ्या काही दिवसांतच त्यांच्या सरकारसमोर पहिले मोठे राजकीय संकट उभे राहिले आहे. मंत्रिमंडळातील ज्येष्ठ नेते आणि कॅबिनेट मंत्री रामलिंगा रेड्डी यांनी अपेक्षित खाते न मिळाल्याच्या नाराजीतून मंत्रिपदाचा राजीनामा दिला आहे. या घडामोडीमुळे नव्या सरकारमध्ये अंतर्गत नाराजी उफाळून आल्याचे स्पष्ट झाले आहे.

सूत्रांच्या माहितीनुसार, रामलिंगा रेड्डी यांना बंगळूरू विकास विभाग मिळेल, अशी अपेक्षा होती. मात्र खातेवाटपात हा विभाग मंत्री कृष्णा बायरे गौडा यांच्याकडे देण्यात आला आणि रेड्डी यांच्याकडे सिंचन खाते सोपवण्यात आले. यामुळे त्यांनी नाराजी व्यक्त करत मंत्रिपदाचा राजीनामा दिला आहे.

काय म्हणाले रामलिंगा रेड्डी?  (Ramalinga Reddy)

राजीनाम्यानंतर प्रसारमाध्यमांशी बोलताना रेड्डी म्हणाले, “मी काँग्रेस पक्षातच आहे. माझा राजीनामा हा पक्षातून नसून केवळ मंत्रिपदाचा आहे. गेली 53 वर्षे मी काँग्रेसमध्ये विविध जबाबदाऱ्या सांभाळल्या आहेत. मी कधीही मंत्रिपद किंवा विशिष्ट खात्याची मागणी केली नाही.”

ते पुढे म्हणाले की, मुख्यमंत्री होण्यापूर्वी डी. के. शिवकुमार यांनी दोनदा त्यांच्या घरी येऊन बंगळूरू विकास विभाग देण्याचे आश्वासन दिले होते. मात्र अखेरीस ते आश्वासन पूर्ण झाले नाही. “मी बंगळूरू खाते मागितले नव्हते, पण ते देण्याचे आश्वासन स्वतः शिवकुमार यांनी दिले होते. त्याऐवजी मला सिंचन खाते देण्यात आले. त्यामुळे मी मंत्रिपदाचा राजीनामा देण्याचा निर्णय घेतला,” असे त्यांनी स्पष्ट केले.

रामलिंगा रेड्डी यांनी हा राजीनामा थेट मुख्यमंत्री किंवा पक्ष नेतृत्वाकडे न देता प्रशासकीय अधिकाऱ्यांमार्फत पाठवण्याचा निर्णय घेतला आहे. तसेच मुख्यमंत्री डी. के. शिवकुमार, सिद्धरामय्या, काँग्रेस अध्यक्ष मल्लिकार्जुन खर्गे किंवा पक्षाच्या हायकमांडविरोधात कोणतीही तक्रार नसल्याचेही त्यांनी सांगितले. आता बंगळूरू विकास विभाग देण्याची ऑफर आली तरी ती स्वीकारणार नसल्याचे त्यांनी स्पष्ट केले.

3 जून रोजी बंगळूरूमध्ये झालेल्या भव्य शपथविधी सोहळ्यात डी. के. शिवकुमार यांनी मुख्यमंत्रीपदाची शपथ घेतली होती. त्यांच्यासोबत 12 हून अधिक मंत्र्यांनीही पदभार स्वीकारला. मात्र अवघ्या तीन दिवसांतच एका वरिष्ठ मंत्र्याच्या राजीनाम्यामुळे सरकारमधील असंतोष समोर आला आहे.

कोण आहेत रामलिंगा रेड्डी?  (Ramalinga Reddy)

72 वर्षीय रामलिंगा रेड्डी हे कर्नाटकच्या राजकारणातील अनुभवी नेते मानले जातात. ते आतापर्यंत आठ वेळा आमदार म्हणून निवडून आले आहेत. यापूर्वी त्यांनी परिवहन, हिंदू धार्मिक आणि धर्मादाय विभाग तसेच गृहमंत्री म्हणूनही जबाबदारी सांभाळली आहे. 2023 च्या विधानसभा निवडणुकीत त्यांनी भाजपचे उमेदवार के. आर. श्रीधरा यांचा पराभव करून विजय मिळवला होता. डी. के. शिवकुमार सरकारमधील हा पहिला मोठा राजकीय धक्का मानला जात असून, आगामी काळात काँग्रेस नेतृत्व ही नाराजी कशी दूर करते याकडे सर्वांचे लक्ष लागले आहे.

हेही वाचा : Congress Rajya Sabha candidate List : काँग्रेसकडून राज्यसभा उमेदवारांची यादी जाहीर! पहा कोणाकोणाला मिळाली संधी?