Congress Rajya Sabha candidate List : राज्यसभा निवडणुकीच्या पार्श्वभूमीवर काँग्रेसने आपल्या उमेदवारांची यादी जाहीर केली असून अनुभवी आणि पक्षाशी एकनिष्ठ राहिलेल्या नेत्यांना संधी दिली आहे. मध्य प्रदेश, कर्नाटक, राजस्थान, तामिळनाडू आणि झारखंड या राज्यांसाठी पक्षाने उमेदवारांच्या नावांची घोषणा केली आहे.

कर्नाटकमधून काँग्रेसचे राष्ट्रीय अध्यक्ष ज्येष्ठ नेते मल्लिकार्जुन खर्गे यांना उमेदवारी देण्यात आली आहे. त्यांच्यासोबत पक्षाचे राष्ट्रीय प्रवक्ते पवन खेडा आणि ज्येष्ठ नेते के. रहमान खान यांचे पुत्र मन्सूर अली खान यांनाही राज्यसभेची उमेदवारी मिळाली आहे. खर्गे शुक्रवारी उमेदवारी अर्ज दाखल करणार असून, या वेळी राहुल गांधींसह काँग्रेसचे अनेक वरिष्ठ नेते उपस्थित राहण्याची शक्यता आहे.

पवन खेडा यांना 2022 मध्ये राज्यसभेची उमेदवारी न मिळाल्याने त्यांनी सार्वजनिकपणे नाराजी व्यक्त केली होती. मात्र यावेळी पक्षाने त्यांच्यावर विश्वास दाखवत राज्यसभेसाठी संधी दिली आहे. तर मन्सूर अली खान हे कर्नाटक काँग्रेसमधील सक्रिय आणि पक्षनिष्ठ नेते मानले जातात. त्यांनी यापूर्वी बंगळुरू सेंट्रल लोकसभा मतदारसंघातून निवडणूकही लढवली होती.  (Congress Rajya Sabha candidate List )

हेही वाचा :  Aamir Khan: ‘होय, आम्ही लग्न करतोय’; आमिर खानने गौरी स्प्रॅटसोबतच्या लग्नाची सांगितली तारीख!

दक्षिण भारतातून आणखी एका महत्त्वाच्या नावाची चर्चा सुरू आहे. काँग्रेसच्या प्रोफेशनल काँग्रेस आणि डेटा-तंत्रज्ञान विभागाचे प्रमुख प्रवीण चक्रवर्ती यांना तामिळनाडूमधून राज्यसभेची उमेदवारी देण्यात आली आहे.

राजस्थानमधून अनुसूचित जाती समाजाचे प्रतिनिधित्व करणारे नीरज डांगी यांना पुन्हा एकदा उमेदवारी देण्यात आली आहे. तर मध्य प्रदेशातून राहुल गांधी यांच्या निकटवर्तीय आणि मंदसौरच्या माजी खासदार मीनाक्षी नटराजन यांना पक्षाने संधी दिली आहे. झारखंडमधून काँग्रेस अध्यक्ष कार्यालयाशी संलग्न असलेले आणि पक्षाचे राष्ट्रीय सचिव प्रणव झा यांची उमेदवारी जाहीर करण्यात आली आहे.  (Congress Rajya Sabha candidate List )

काँग्रेसच्या या उमेदवार यादीची राजकीय वर्तुळात जोरदार चर्चा सुरू असून, पक्षाने अनुभव, सामाजिक प्रतिनिधित्व आणि निष्ठा यांचा समतोल साधण्याचा प्रयत्न केल्याचे मानले जात आहे.

दरम्यान, राज्यसभेच्या 24 जागांसाठी 18 जून रोजी मतदान होणार असून त्याच दिवशी मतमोजणीही होणार आहे. उमेदवारी अर्ज दाखल करण्याची अंतिम मुदत 8 जून आहे. आंध्र प्रदेश, गुजरात आणि कर्नाटकमध्ये प्रत्येकी चार, मध्य प्रदेश व राजस्थानमध्ये प्रत्येकी तीन, झारखंडमध्ये दोन, तर मणिपूर, मेघालय, अरुणाचल प्रदेश आणि मिझोराममध्ये प्रत्येकी एका जागेसाठी निवडणूक होणार आहे.

हेही वाचा : Navneet Rana : मोठा ट्वीस्ट! नवनीत राणांना राज्यसभेची लॅाटरी लागणार? भेटीमुळे चर्चांना उधाण