मुंबईः राज्यात शिवसेना शिंदे पक्षाकडून अॅापरेशन टायगर मोहिमेची चर्चा आहे. ठाकरे गटातील ६ खासदार शिंदेंच्या संपर्कात असून लवकरच ते शिवसेनेत (शिंदे) प्रवेश करणार असल्याचे सांगितले जात आहे. तसेच यासोबतच काही आमदारही पक्षप्रवेश करणार असे सांगितल्याने राजकीय वर्तुळात मोठी खळबळ उडाली आहे. पुढील ९० दिवसांत टप्प्याटप्प्याने हे पक्षप्रवेश करणार असल्याचे शिवसेनेचे मंत्री उदय सामंत यांनी सांगितले. या पार्श्वभूमीवर रत्नागिरी जिल्ह्यातील उद्धव सेनेचा माजी आमदार लवकरच शिवसेना शिंदेंच्या पक्षात प्रवेश करणार असल्याचे सांगितले जात आहे.

शिवसेना शिंदे पक्षाकडून अॅापरेशन टायगरबद्दल सांगितले जात असून आमची वज्रमूठ आहे, अशी भूमिका ठाकरेंच्या खासदारांनी घेतली आहे. शुक्रवारी पत्रकार परिषद घेत त्यांनी ही माहिती दिली. मात्र, राज्यात अॅापरेशन टायगरच्या माध्यमातून मोठ्या राजकीय घडामोडी घडताना दिसत आहे. अॅापरेशन टॅायगर मोहिमची मदार शिवसेनेचे मंत्री उदय सामंत यांच्यावर सोपवण्यात आली आहे. आता टॅायगर अॅापरेशन अॅक्टिव्ह झाले असून त्याची सुरूवात सामंतांच्या रत्नागिरी जिल्ह्यातून झाल्याची माहिती मिळत आहे.

रत्नागिरी जिल्ह्यातील चिपळून संगमेश्वर विधानसभा मतदारसंघाचे माजी शिवसेना आमदार सुभाष बन यांनी शुक्रवारी उपमुख्यमंत्री एकनाथ शिंदे यांची भेट घेतल्याने चर्चांणा उधाण आले आहे. बन यांच्या भेटीनंतर ते आता अॅापरेशन टायगर मार्फेत शिवसेना शिंदे पक्षात प्रवेश करणार असल्याचे बोलले जात आहे. त्यांनी उद्योग मंत्री उदय सामंत यांच्यासमवेत शिवसेना मुख्य नेते आणि उपमुख्यमंत्री एकनाथ शिंदे यांची ठाणे शहरात भेट घेतली.

ठाकरेंच्या सेनेला संभाजीनगरमध्ये खिंडार

उद्धव ठाकरे गटाला शुक्रवारी मोठा धक्का बसला असून संभाजीनगरमधील १० माजी नगरसेवकांनी अॅापरेशन टायगरच्या पार्श्वभूमीवर शिवसेना शिंदे गटात पक्षप्रवेश केला. यामुळे ऐन स्थानिक स्वराज्या संस्थांच्या निवडणुकीआधी माजी नगरसेवकांनी ठाकरेंची साथ सोडल्याने हा त्यांच्यासाठी मोठा धक्का मानला जात आहे. काल या १० माजी नगरसेवकांनी मुंबईत शिंदेंच्या उपस्थित शिवसेना शिंदे पक्षात प्रवेश केला.

खासदार राजाभाऊ वाजेंने वृत्त फेटाळले 

अॅापरेशन टायगरची जोरदार चर्चा असून यावर उबाठा गटाचे नाशिकचे खासदार राजाभाऊ वाजे यांनी प्रतिक्रिया दिली आहे. अॅापरेशन टायगर सहभागाच्या वृत्त खासदार राजाभाऊ वाजे यांनी फेटाळून लावले आहे. ‘मी तर फाटका माणूस आहे. माझ्याकडे ईडी, सीबीआय कशासाठी येतील? आले तरी त्यांना काय सापडणार आहे?’ अशी प्रतिक्रिया वाजे यांनी माध्यमांना दिली. तसेच आपण शेवटपर्यंत शिवसेना ठाकरे गटासोबतच राहणार असल्याचा दावा वाजे यांनी केला आहे.