माजी आमदार टिळेकर यांचा पाठपुरावा तर माजी नगरसेवक इनामदार यांच्या शिष्टाइला यश

हडपसर – ससाणेनगर-सय्यदनगर येथील रेल्वेगेट क्रमांक सातवरील वाहतूक कोंडीचा प्रश्‍न गेली चाळीस वर्षे रेंगाळलेला होता. मात्र, मी आमदार झाल्यानंतर येथील वाहतुकीला पर्यायी मार्ग म्हणून रेल्वेगेट क्रमांक सहा आणि सातच्या तसेच सात आणि आठच्या मध्ये दोन भुयारी मार्ग केले. पालिका आणि रेल्वे विभागाचा तीन वर्षे पाठपुरावा करून आज त्यातील एक भुयारी मार्ग सुरू होत आहे. एक ते दीड महिन्यात दुसराही भुयारी मार्गही सुरू होईल. हे मार्ग सुरू झाल्यानंतर वाहतूक कोंडी सुटण्यास मदत होणार आहे. त्यामुळे आता ज्यांना-ज्यांना ससाणेनगर रेल्वेगेट क्रमांक सातवर भुयारी मार्ग करावा वाटतो, तो त्यांनी निश्‍चितच करावा, असे भाजप युवा मोर्चाचे प्रदेशाध्यक्ष माजी आमदार योगेश टिळेकर यांनी सांगितले.

करोनाच्या पार्श्‍वभूमीवर वाहन चालकांना गुलाबपुष्प आणि मास्क देऊन सासणेनगर रेल्वेगेट क्रमांक सात जवळील न्यू इंग्लिश स्कूल समोरील पर्यायी भुयारी मार्ग माजी आमदार योगेश टिळेकर यांनी वाहतुकीस खुला करून दिला.

यावेळी भाजप हडपसर विधानसभा अध्यक्ष संदीप दळवी, माजी अध्यक्ष सुभाष जंगले, नगरसेविका स्थायी समिती सदस्य उज्वला जंगले, नितीन होले, पोपटराव वाडकर, गणेश घुले, संजय सातव, भुषण तुपे, नाना ससाणे, महेश ससाणे, गणेश वाडकर, संतोष दवणे, संजय भुजबळ, आकाश डांगमाळी, इम्तियाज मोमीन आदींसह भाजपचे पदाधिकारी व कार्यकर्ते उपस्थित होते.

माजी आमदार टिळेकर म्हणाले की, ससाणेनगर, सय्यदनगर, हांडेवाडी आणि महमंदवाडीतील नागरिकांना या मार्गांतून दिलासा मिळणार आहे. कारण, सात क्रमांक रेल्वे फाटकाजवळील पर्यायी भुयारी मार्ग आज दुचाकी व चारचाकी वाहनांसाठी खुला करण्यात आला आहे. दरम्यान, एक-दिड महिन्यांत रवी पार्क जवळील दुसरा भुयारी मार्गाचे काम पूर्ण होणार असून, त्यावेळी हा भुयारी मार्ग सर्व वाहनांसाठी खुला होईल, त्यानंतर येथील मुख्य रेल्वेगेट क्रमांक सातवरील वाहतूक कोंडी सुटण्यास काही प्रमाणात मदत होईल.

हडपसर – ससाणेनगर येथील बहुचर्चित भुयारी मार्ग खडतर प्रयत्नानंतर अखेर सुरू झाला आहे. येथील रस्त्यांमध्ये जागामालकांना मोबदला देण्याचा प्रश्‍न प्रलंबित असताना माजी नगरसेवक फारूक इनामदार यांनी पुढाकार घेऊन स्वतःची जागा देऊन रस्ता सुरू केला आहे. त्यामुळे येथील वाहतूक कोंडी सुटण्यास मोठी मदत होणार असून यासाठी प्रयत्नशील सर्वांना यश आल्याची भावना नागरिकांनी व्यक्त केली आहे.

ससाणेनगर-सय्यद नगर येथील रेल्वेगेटमुळे वाहनचालक व नागरिकांना मोठी कसरत करावी लागत होती. दरम्यान, येथील भुयारी मार्गाची खासदार डॉ. अमोल कोल्हे व आमदार चेतन तुपे यांनी प्रत्यक्षात पाहणी केली त्यानंतर अधिकाऱ्यांच्या बैठका घेऊन येथील काम तातडीने करण्याबाबत सूचना दिल्या होत्या.

महापालिकेच्या माध्यमातून भुयारी मार्गाच्या दोन्ही बाजूला असलेल्या रस्त्यांची कामे होत असताना येथील जागा बाधित मिळकत धारकांनी न्यायालयात आव्हान दिले, त्यामुळे भुयारी मार्ग अधांतरी लटकला होता. माजी नगरसेवक फारुक इनामदार यांनी पुढाकार घेऊन जमीन मालकांची बैठक घेतली, तसेच पंचवीस लाख रुपये खर्च करून रस्त्यामधील मिळकत विकत घेऊन महापालिकेला हस्तांतरित केली व येथील रस्त्याचे डांबरीकरण झाले. त्यामुळे आज अखेर हा भुयारी मार्ग खुला झाल्याने वाहनचालकांनी मोकळा श्‍वास घेतला. राष्ट्रवादी कॉंग्रेसचे माजी नगरसेवक फारूक इनामदार यांनी भुयारी मार्ग व रस्त्याची पाहणी केली.

यावेळी अर्जुन सातव, सुफियान इनामदार, बाळासाहेब ससाणे, प्रणय राजेभोसले, कृष्णाजी महाजन, बारीक आल्हाट, मारुती आमने, संजय शिंदे, वसीम शेख, मीनाताई थोरात, रफी इनामदार, योगेश जगताप, डॉ.शंतनु जगदाळे, सोनू बहिरट, इरफान शेख, मुबारक इनामदार, मोहंमदीन खान, जावेद शेख स्थानिक रहिवासी मोठ्या संख्येने उपस्थित होते. गेट नंबर सात येथे भुयारी मार्ग करून रवी पार्क येथील भुयारी मार्ग खुला करण्यासाठी पाठपुरावा करणार असल्याचेही फारूक इनामदार यांनी सांगितले.