जयपूर : राजस्थानातील भजनलाल शर्मा यांचे सरकार राजस्थानमध्ये खेळांना प्रोत्साहन देण्यासाठी सतत प्रयत्न करत असून राज्यात आता ओपन जिम बांधण्याबाबत सरकार ठोस पुढाकार घेत असल्याचे दिसून येत आहे. राजस्थानमधील पाच हजारांहून अधिक लोकसंख्या असलेल्या 3,500 ग्रामपंचायतींमध्ये ओपन जिम स्थापन केले जाणार आहेत.

राजस्थानचे क्रीडा आणि युवा व्यवहार मंत्री राज्यवर्धन राठोड यांनी सोमवारी विधानसभेत या संदर्भात माहिती दिली. राठोड म्हणाले की, राज्य सरकार युवकांना क्रीडा उपक्रमांसाठी प्रोत्साहित करण्यासाठी वचनबद्ध आहे. निर्धारित निकषांनुसार क्रीडा सुविधांचा विस्तार केला जाईल. राज्यात क्रीडा संबंधित पायाभूत सुविधा विकसित करण्यासाठी २०२५-२६ च्या अर्थसंकल्पात तरतुदी करण्यात आल्या आहेत आणि पाच हजारांपेक्षा जास्त लोकसंख्या असलेल्या ३,५०० ग्रामपंचायतींमध्ये ओपन जिम’ उभारण्यात येतील.

प्रश्नोत्तराच्या तासात या संदर्भात सदस्याने विचारलेल्या पुरवणी प्रश्नाचे उत्तर राज्यवर्धन राठोड देत होते. ते म्हणाले की, राज्यात खेळांना प्रोत्साहन देण्यासाठी क्रीडा आणि युवा व्यवहार विभाग आणि राजस्थान राज्य क्रीडा परिषदेकडून स्टेडियम बांधण्यासाठी विविध योजना राबविल्या जात आहेत. राज्य सरकारने एकात्मिक स्टेडियम (क्रीडा पायाभूत सुविधा) विकास कार्यक्रमासाठी निकष निश्चित केले आहेत.

ते म्हणाले, मेजर ध्यानचंद स्टेडियम योजनेअंतर्गत राज्यातील प्रत्येक ब्लॉकमध्ये टप्प्याटप्प्याने क्रीडा स्टेडियमच्या विकास कामासाठी आमदार-खासदार निधी, लोकप्रतिनिधी, जनसहकार्य, सीएसआर, स्थानिक संस्था इत्यादींकडून मिळणाऱ्या रकमेइतकी रक्कम किंवा जास्तीत जास्त एक कोटी रुपये मॅचिंग ग्रँट म्हणून देण्याची तरतूद करण्यात आली आहे.