Girish Mahajan : ‘कोटा अपघातातील जखमीना तातडीने उपचार द्या’; मंत्री गिरीश महाजन यांचे राजस्थान प्रशासनाला निर्देश
Kota Accident : अपघाताची माहिती मिळताच राज्याचे आपत्ती व्यवस्थापन मंत्री गिरीश महाजन यांनी तातडीने कोटा जिल्हा प्रशासनाशी संपर्क साधला.

Girish Mahajan : राजस्थानमध्ये खाटू श्यामजीचे दर्शन घेऊन महाराष्ट्राकडे परतत असताना या कुटुंबावर काळाने घाला घातला. कोटा-उदयपूर राष्ट्रीय महामार्गावर मध्यरात्री भीषण अपघाताची घटना घडली. या दुर्घटनेत महाराष्ट्रातील धुळे जिल्ह्यातील एकाच कुटुंबातील ९ जणांचा मृत्यू झाला असून, ६ जण गंभीर जखमी झाले आहेत. मृतांमध्ये लहान मुलांचाही समावेश आहे.
खाटू श्याम मंदिराचे दर्शन घेऊन गावी परतणाऱ्या भाविकांच्या क्रूझर वाहनाची महामार्गावर उभ्या असलेल्या ट्रकला जोरदार धडक बसली. या घटनेची माहिती मिळताच राज्याचे आपत्ती व्यवस्थापन मंत्री गिरीश महाजन यांनी तातडीने कोटा जिल्हा प्रशासनाशी संपर्क साधला.
अपघातातील जखमींना तात्काळ सर्वोत्तम वैद्यकीय उपचार उपलब्ध करून देण्यासह गरज भासल्यास त्यांना मोठ्या रुग्णालयात हलविण्याच्या सूचना महाजन यांनी दिल्या आहेत.
तसेच मृतांचे पार्थिव लवकरात लवकर त्यांच्या मूळ गावी पोहोचविण्यासाठी आवश्यक ती व्यवस्था करण्याचे निर्देशही त्यांनी राजस्थान प्रशासनाला दिले आहेत. या संपूर्ण प्रकरणात महाराष्ट्र शासनाकडून सर्वतोपरी मदत केली जाईल, अशी ग्वाही मंत्री गिरीश महाजन यांनी दिली आहे.
अपघात नेमका कसा झाला?
महाराष्ट्रातील धुळे या ठिकाणी वास्तव्यास असलेली तीन कुटुंबं स्वतंत्र वाहनांतून खाटू श्यामजी मंदिरात दर्शनासाठी गेली होती. दर्शनावरून परतताना, रविवारी मध्यरात्री २ च्या सुमारास कोटा-उदयपूर महामार्गावरील शंभूपुरा गावाजवळ त्यांची क्रूझर गाडी रस्त्याच्या कडेला उभ्या असलेल्या एका ट्रकवर जाऊन आदळली.
धडक इतकी भीषण होती की, क्रूझर गाडी पूर्णपणे चक्काचूर झाली आणि त्यातील प्रवाशांना सावरण्याची संधीही मिळाली नाही आणि ९ जणांचा जागीच मृत्यू झाला. स्थानिक नागरिकांच्या मदतीने त्यांनी बचावकार्य सुरू केले. जखमींना तातडीने कोटा मेडिकल कॉलेज रुग्णालयात दाखल करण्यात आले असून, तिथे त्यांच्यावर उपचार सुरू आहेत. मृतांचे मृतदेह रुग्णालयाच्या शवागारात ठेवण्यात आले आहेत.
हेही वाचा:





