ग्रामीण भागातील कामकाज नियमित राहणार : पुणे विद्यापीठ प्रशासनाचे आदेश

पुणे – करोनाच्या पार्श्‍वभूमीवर राज्य शासनाने शाळा व महाविद्यालये बंद ठेवण्याचे आदेश दिले आहेत. मात्र, वरिष्ठ महाविद्यालये सुरू ठेवावीत की नाही, याबाबतचा संभ्रम आता दूर झाला आहे. यासंदर्भात उच्च शिक्षण विभागाने परिपत्रक प्रसिद्ध केल्याने फक्‍त पुणे व पिंपरी चिंचवड शहरातील संलग्नित महाविद्यालये व मान्यताप्राप्त संस्था बंद राहतील. मात्र पुणे विद्यापीठाच्या कार्यक्षेत्रातील पुणे ग्रामीण, नगर आणि नाशिक जिल्ह्यातील महाविद्यालये सुरू राहणार आहेत.

याबाबत उच्च शिक्षण विभागाचे पुणे विभागीय सहसंचालक डॉ. मोहन खताळ यांनी परिपत्रक प्रसिद्ध केले. राज्य शासनाने घेतलेल्या धोरणात्मक निर्णयानुसार पुणे व पिंपरी चिंचवड परिसरातील कृषी, अकृषी, अर्थसहाय्यीत, अभिमत विद्यापीठ, अशासकीय अनुदानित, विनाअनुदानित व कायम विनाअनुदानित महाविद्यालये व शेैक्षणिक संस्थांना राज्य शासनाचे पुढील आदेश येईपर्यंत बंद ठेवण्याचे निर्देश दिले आहेत. त्यानुसार तत्काळ कार्यवाही करण्याचे आदेश उच्च शिक्षण विभागाने दिले आहेत. मात्र पूर्वनियोजित लेखी व प्रात्यक्षिक परीक्षांचे कामकाज सुरू राहणार असल्याचे त्यांनी स्पष्ट केले.

व्यावसायिक अभ्यासक्रमांच्या संस्थाही बंद
पुणे व पिंपरी-चिंचवड परिसरातील सर्व तंत्रनिकेतन व व्यावसायिक अभ्यासक्रम संस्थांही बंद ठेवण्याचे आदेश तंत्रशिक्षण विभागाने दिले आहेत. राज्य शासनाचे आदेश पुढील आदेश येईपर्यंत विद्यार्थी अनावश्‍यक फिरणार नाही, याची संबंधित संस्थांनी सूचना द्यावी, अशी माहिती तंत्रशिक्षणच्या पुणे विभागीय सहसंचालक डॉ. डी. आर. नंदनवार यांनी दिली.