Maharashtra Politics : एका नेत्याने बंडखोरी केली, दुसऱ्याने राजीनामा दिला; मुख्यमंत्री देवेंद्र फडणवीसांच्या भेटीनंतर मोठी बातमी समोर
Maharashtra Politics : भाजपचे ज्येष्ठ नेते आणि माजी आमदार अनिल सोले यांनी आपला अपक्ष उमेदवारी अर्ज मागे घेतला आहे.
Maharashtra Politics : महाराष्ट्रात विधानपरिषदेच्या निवडणुकीची रणधुमाळी सुरू असतानाच नागपूर पदवीधर मतदारसंघात मोठी राजकीय घडामोड घडली आहे. भाजपमधील अंतर्गत नाराजी आणि बंडखोरीमुळे चर्चेत आलेल्या या मतदारसंघात अखेर पक्षाच्या वरिष्ठ नेतृत्वाला बंड शमवण्यात यश आलं आहे.
भाजपचे ज्येष्ठ नेते आणि माजी आमदार अनिल सोले यांनी आपला अपक्ष उमेदवारी अर्ज मागे घेतला आहे. मुख्यमंत्री देवेंद्र फडणवीस यांनी स्वतः पुढाकार घेत सोलेंची समजूत काढल्यानंतर निवडणुकीतून माघार घेण्याचा निर्णय सोले यांनी घेतला आहे. तसेच माजी आमदार गिरीश व्यास यांनीही आपला राजीनामा मागे घेतला आहे.
नेमकं काय घडलं? (Maharashtra Politics)
नागपूर विभाग पदवीधर मतदारसंघातून भाजपकडून उमेदवारी मिळवण्यासाठी अनिल सोले इच्छुक होते. मात्र, पक्षाने सुधाकर कोहळे यांना उमेदवारी जाहीर केल्यानंतर सोले नाराज झाले. त्यांनी बंडखोरी करत अपक्ष उमेदवारी अर्ज दाखल करत पक्षाच्या निर्णयाला आव्हान दिले. त्यांच्या या भूमिकेमुळे भाजपमधील अंतर्गत मतभेद चव्हाट्यावर आले होते.
Devendra Fadnavis
दरम्यान, भाजपचे माजी आमदार गिरीश व्यास यांनीही अनिल सोले यांच्या भूमिकेला जाहीर पाठिंबा दिला. त्यांनी पक्षाच्या प्राथमिक सदस्यत्वाचा राजीनामा दिल्याने पक्षांतर्गत नाराजीच्या चर्चांना आणखी जोर आला. त्यामुळे नागपूर पदवीधर मतदारसंघातील निवडणूक भाजपसाठी प्रतिष्ठेची बनली होती.
देवेंद्र फडणवीस मैदानात; अखेर बंडखोरीवर पडदा
या पार्श्वभूमीवर १२ ऑक्टोबर रोजी नागपुरात भाजपची महत्त्वाची बैठक पार पडली. नागपूर पदवीधर मतदारसंघात विजय मिळवण्यासाठी आखण्यात येणारी रणनीती आणि पक्षातील नाराजी दूर करण्याबाबत या बैठकीत चर्चा झाल्याचे सांगितले जात आहे. या बैठकीला मुख्यमंत्री देवेंद्र फडणवीस उपस्थित होते.
बैठकीनंतर देवेंद्र फडणवीस यांनी थेट अनिल सोले यांच्या निवासस्थानी जाऊन त्यांची भेट घेतली. सोलेंची समजूत काढण्यासाठी वरिष्ठ नेतृत्वाने केलेले प्रयत्न अखेर यशस्वी ठरले आणि त्यांनी निवडणुकीतून माघार घेण्याचा निर्णय घेतला. त्यामुळे भाजपमधील बंडखोरीला पूर्णविराम मिळाला आहे.
आता भाजप विरुद्ध काँग्रेस थेट लढत
अनिल सोले यांनी माघार घेतल्यामुळे नागपूर पदवीधर मतदारसंघातील लढतीचे चित्र बदलले आहे. आता भाजपचे सुधाकर कोहळे आणि काँग्रेसचे अभिजीत वंजारी यांच्यात थेट लढत होणार आहे. एकीकडे भाजपने बंडखोरी शमवण्यासाठी यशस्वी प्रयत्न केल्याचे चित्र असले, तरी या संपूर्ण घडामोडींचा निवडणुकीवर नेमका काय परिणाम होणार, हे पाहणे महत्त्वाचे ठरणार आहे.
