पुणेः दोन दिवसांवर ३१ डिसेंबर येऊन ठेपलेला आहे. सरत्या वर्षाला निरोप देण्यासाठी आणि नववर्षाच्या स्वागतासाठी अनेकांकडून पार्टीचे प्लॅान सुरू आहेत. यात प्रामुख्याने डीजे नाईट आदी गोष्टी तरुणाईकडून करण्यात येतात. मात्र, बऱ्याचवेळा नववर्षाच्या स्वागत करत असताना अनेकांकडून पोलिसांनी घालून दिलेल्या नियामांची पालमल्ली करण्यात येते.

या दिवशी अनेकजण मद्य प्राशन करीत असतात. यामुळे या दिवसाच्या अनुषंगाने पुणे पोलीस सज्ज झाले असून वाहतूक शाखेकडून डिस्पोजेबल पाईपच्या माध्यमातून ब्रेथ अॅनलायझरच्या मदतीने ड्रंक अॅन्ड ड्राईव्ह विरोधात ३० ठिकाणी कारवाई करण्यात येणार असल्याची माहिती पोलिसांनी दिली आहे.

लोकसभेपाठोपाठ विधानसभेची निवडणूक झाली. या काळात कोणताही अनुचित प्रकार घडू नये याकरिता पुणे पोलिसांनी विशेष मोहिम राबविली होती. या काळात मद्यप्राशन वाहने चालवणाऱ्यांवर पोलिसांनी दंडात्मक कारवाई केली होती. १ जानेवारी ते २७ डिसेंबर या काळात ५,२५६ मद्य प्राशन करून वाहने चालवणाऱ्यांवर पोलिसांनी दंडात्मक कारवाई केल्याची माहिती पोलिसांनी दिली.

३१ डिसेंबरला ब्रेथ अॅनालाझर तपासणी 

लॅाकडाऊनच्या काळात ब्रेथ अॅनलायझर तपासणीची मोहिम बंद करण्यात आली होती. डिसेंबर २०२३ मध्ये पुन्हा एकदा या मोहिमेची सुरूवात करण्यात आली. ३१ डिसेंबर या दिवशी अनेकांकडून नियमांचे उल्लघन करण्यात येते असते. यामुळे आता बंद असलेली ब्रेथ अॅनलायझर तपासणीची विशेष मोहिम पुणे पोलिसांना सुरू राहणार आहे.