Omraje Nimbalkar : राज्याच्या राजकारणात एक अत्यंत खळबळजनक आणि मोठी घडामोड घडली असून शिवसेना उद्धव बाळासाहेब ठाकरे पक्षाच्या ६ खासदारांनी तडकाफडकी उपमुख्यमंत्री एकनाथ शिंदे यांच्या नेतृत्वाखालील शिवसेनेत (Omraje Nimbalkar) जाहीर प्रवेश केला आहे.

यामध्ये धाराशिवचे आक्रमक खासदार ओमराजे निंबाळकर (Omraje Nimbalkar) यांचाही समावेश आहे. केवळ आणि केवळ आपल्या मतदारसंघातील विकासकामांना गती देण्यासाठीच आपण सत्तेत सहभागी होत आहोत, अशी भूमिका या सर्व खासदारांनी मांडली आहे.

मात्र, काल अत्यंत उत्साहात पार पडलेल्या या ऐतिहासिक पक्षप्रवेशानंतर अवघ्या २४ तासांतच खासदार ओमराजे निंबाळकर यांनी केलेल्या एका धक्कादायक विधानामुळे आता राजकीय वर्तुळात प्रचंड खळबळ उडाली असून उलट-सुलट चर्चांना उधाण आले आहे.

उपमुख्यमंत्री एकनाथ शिंदे यांच्या उपस्थितीत महायुतीत प्रवेश केला असला, तरी धाराशिव जिल्ह्यातील स्थानिक राजकारणात आपण कोणतीही तडजोड करणार नसल्याचे ओमराजे निंबाळकर यांनी स्पष्ट केले आहे.

सूत्रांनी दिलेल्या माहितीनुसार, महायुतीमध्ये सामील झालो तरी आपला आपल्या जिल्ह्यात स्थानिक विरोधकांशी असलेला संघर्ष कायम राहणार असल्याचे त्यांनी ठणकावून सांगितले. राज्यात नेमकी काय परिस्थिती असेल हे ठाऊक नाही, परंतु जिल्ह्यात आपण स्थानिक महायुतीच्या नेत्यांसोबत कधीही मांडीला मांडी लावून बसू शकत नाही, अशी अत्यंत आक्रमक भूमिका त्यांनी घेतली आहे.

इतकेच नव्हे तर, भाजपचे स्थानिक नेते आणि त्यांचे पारंपरिक राजकीय विरोधक राणाजगजितसिंह पाटील यांचा थेट उल्लेख करत, ‘राणा पाटलांचे एकही मत मला नको’ अशा शब्दांत त्यांनी आपला तीव्र विरोध दर्शवला आहे.

यासोबतच, गेल्या काही दिवसांपासून विरोधकांकडून त्यांच्या खासदार निधीवरून होत असलेल्या आरोपांचाही ओमराजेंनी (Omraje Nimbalkar) खरपूस समाचार घेतला. २०१९ ते २०२४ या आपल्या मागील कार्यकाळातील खासदार निधीची संपूर्ण माहिती विरोधकांनी आधी काढून पाहायला हवी होती, असा टोला त्यांनी लगावला. त्या कार्यकाळातला आपला एकही पैसा शिल्लक राहिला नसून विकासकामांसाठी तो पूर्ण वापरला गेला असल्याचा दावा त्यांनी केला.

खासदार निधीचा कार्यकाळ हा पाच वर्षांचा असतो आणि चालू कार्यकाळ अजून पूर्ण संपलेला नसतानाही निधीच्या वाटपावरून आणि त्याच्या वापरावरून असे निरर्थक प्रश्न कसे काय उपस्थित केले जातात, असा सवाल त्यांनी उपस्थित केला आहे.

या संपूर्ण राजकीय नाट्यात ओमराजे निंबाळकर यांनी पुढे बोलताना भविष्यातील बंडखोरीचे थेट संकेत दिले आहेत. आपण राजकारणात केवळ न्याय मिळवण्यासाठी आलो आहोत आणि जर आपल्याला योग्य न्याय मिळाला नाही, तर आपली पुढची भूमिका पूर्णपणे वेगळी असेल, असा इशारा त्यांनी दिला.

जागावाटपाच्या गणितावर भाष्य करताना त्यांनी स्पष्ट केले की, २०२९ च्या आगामी निवडणुकीत जर महायुतीत धाराशिवची जागा आपल्यासाठी सुटली नाही, तर आपण थेट अपक्ष म्हणून निवडणूक लढवण्यास मागेपुढे पाहणार नाही.

सध्या शिवसेना पक्षप्रमुख उद्धव ठाकरे यांचा दौरा नियोजित असून, हा दौरा पूर्ण झाल्यानंतर मी या सर्व घडामोडींवर अत्यंत सविस्तरपणे आणि जाहीरपणे बोलेन अशी सावध भूमिका सध्या त्यांनी घेतली आहे. परंतु, पक्षांतराच्या दुसऱ्याच दिवशी अपक्ष लढण्याची भाषा केल्यामुळे ओमराजे आगामी काळात उपमुख्यमंत्री एकनाथ शिंदे यांचा आदेश डावलून महायुतीला मोठा धक्का तर देणार नाहीत ना, असा गंभीर प्रश्न आता राजकीय तज्ज्ञांकडून उपस्थित केला जात आहे.

दरम्यान, कालच या ६ खासदारांचा अधिकृत पक्षप्रवेश झाला तेव्हा उपमुख्यमंत्री एकनाथ शिंदे यांनी या सर्वांना आगामी निवडणुकीत उमेदवारी देण्याची मोठी घोषणा केली होती. हे सहाच्या सहा खासदार आगामी काळात अधिकृतपणे शिवसेनेच्या तिकिटावर आणि पक्षाचे चिन्ह असलेल्या ‘धनुष्यबाणावर’च निवडणूक लढवतील आणि ते मोठ्या मताधिक्याने निवडूनही येतील, असा ठाम विश्वास शिंदेंनी व्यक्त केला होता. तसेच हे सर्वजण आता पूर्णपणे शिवसेनेत सामील झाले आहेत, त्यामुळे ‘तुम्ही समजून घ्या काय समजून घ्यायचं ते’ असे म्हणत त्यांनी विरोधकांना सूचक इशारा दिला होता.