Omraje Nimbalkar : राजकीय वर्तुळातून एक अत्यंत मोठी आणि खळबळजनक बातमी समोर येत आहे. उद्धव ठाकरे यांच्या पक्षातील तब्बल सहा खासदारांनी बंड पुकारले असून, हे सर्व खासदार लवकरच उपमुख्यमंत्री एकनाथ शिंदे यांच्या पक्षात (शिवसेना) जाहीर प्रवेश करणार असल्याचे समजते. सर्व कायदेशीर बाबींचा आणि नियमांचा अभ्यास करूनच शिंदे गटाकडून या खासदारांच्या पक्षप्रवेशाची अधिकृत घोषणा केली जाणार आहे.

मात्र, या बंडखोरीचे वृत्त समोर येताच स्थानिक पातळीवर ठाकरे गटाच्या शिवसैनिकांमध्ये आणि कार्यकर्त्यांमध्ये प्रचंड संतापाची लाट उसळली आहे. अनेक ठिकाणी बंडखोर खासदारांचे पुतळे जाळण्यात आले असून, ‘जोडेमारो’ आंदोलन करत कार्यकर्त्यांनी आपला रोष व्यक्त केला आहे.

धाराशिवमध्ये राजकीय भूकंप

या संपूर्ण बंडखोरीत माजी मुख्यमंत्री उद्धव ठाकरे यांचे खंदे समर्थक आणि निष्ठावंत म्हणून ओळखले जाणारे धाराशीवचे खासदार ओमराजे निंबाळकर (Omraje Nimbalkar) यांचे नाव समोर आल्याने सर्वांनाच मोठा धक्का बसला आहे. ओमराजे यांच्या बंडखोरीमुळे आता त्यांच्याच बालेकिल्ल्यात म्हणजेच धाराशीव जिल्ह्यात त्यांच्यासमोर मोठे राजकीय संकट उभे ठाकले आहे.

ओमराजे निंबाळकर (Omraje Nimbalkar) यांच्या या निर्णयावर उद्धव ठाकरे शिवसेनेचे धाराशीव जिल्हाप्रमुख रणजित पाटील यांनी अत्यंत आक्रमक भूमिका घेतली आहे. रणजित पाटील यांनी खासदार ओमराजे निंबाळकर यांना थेट आणि खुलं आव्हान दिले आहे की “तुम्ही आधी तुमची ‘Y+’ सुरक्षा हटवा आणि मग मतदारसंघात येऊन दाखवा, धाराशीवची जनता तुम्हाला तुमची जागा दाखवून देईल आणि चांगलाच धडा शिकवेल.”

रणजित पाटलांचा घणाघात

जिल्हाप्रमुख रणजित पाटील यांनी ओमराजे (Omraje Nimbalkar) यांच्या निष्ठेवर प्रश्नचिन्ह उपस्थित करत अत्यंत रोखठोक शब्दांत टीका केली. “ज्या निष्ठेच्या जोरावर तुम्ही संपूर्ण महाराष्ट्रात परिचित झालात, त्या निष्ठेचे तुम्ही पक्षाला हेच फळ दिले का? आज तुमची ओळख एक ‘गद्दार’ म्हणून होत आहे,” अशा शब्दांत त्यांनी आपला संताप व्यक्त केला.

यावेळी बोलताना त्यांनी पक्षांतर्गत परिस्थितीवरही प्रकाश टाकला. ते म्हणाले, “गेल्या चार दिवसांपासून जिल्ह्यातील राजकीय परिस्थितीचा आढावा घेण्यासाठी स्वतः उद्धव ठाकरे मला सतत फोन करत होते.

मी त्यांना शब्द दिला आहे आणि आजही सांगतो की, धाराशीव जिल्ह्यातील ठाकरे शिवसेनेचा एकही अधिकृत पदाधिकारी किंवा कार्यकर्ता ओमराजे निंबाळकर यांच्यासोबत जाणार नाही.” तसेच, आगामी २०२९ च्या लोकसभा निवडणुकीत धाराशीव मतदारसंघात पुन्हा एकदा उद्धव बाळासाहेब ठाकरे यांच्याच पक्षाचा भगवा फडकेल आणि पक्षाचाच खासदार निवडून येईल, असा ठाम विश्वास त्यांनी व्यक्त केला.

‘जनतेच्या पैशांवर निवडून आलात आणि पक्षाशीच प्रतारणा केली’

रणजित पाटील यांनी ओमराजे यांच्यावर टीका करताना जुन्या आठवणींना उजाळा दिला. २०२४ च्या लोकसभा निवडणुकीचा उल्लेख करत ते म्हणाले की, “त्या निवडणुकीत धाराशीवच्या जनतेने स्वतःच्या खिशातील पैसे खर्च करून ओमराजेंना निवडून दिले होते. परंतु, त्यांनी जनतेच्या या पवित्र मतांशी आणि विश्वासाशी प्रतारणा केली आहे.

२०२४ च्या विधानसभा निवडणुकीत मी स्वतः आमदारकीसाठी इच्छुक होतो आणि निवडणुकीला उभा राहत होतो, मात्र फक्त ओमराजे यांच्या सांगण्यावरून आणि शब्दाखातर मी माझा उमेदवारी अर्ज मागे घेतला होता,” अशी खंतही त्यांनी बोलून दाखवली. खासदार संजय राऊत यांनी ‘गद्दारांना तुडवा’ असा आदेश दिल्यानंतरच ओमराजे निंबाळकर यांना भीतीपोटी सुरक्षा घ्यावी लागली आहे, असा टोलाही त्यांनी लगावला.

ओमराजे आपला गड कसा राखणार?

ठाकरे गटाचा एकही कार्यकर्ता पाठीशी राहणार नाही, अशी स्पष्ट भूमिका जिल्हाप्रमुखांनी घेतल्यामुळे आता धाराशीव जिल्ह्यात ओमराजे निंबाळकर (Omraje Nimbalkar) पूर्णपणे एकटे पडल्याचे चित्र निर्माण झाले आहे. कार्यकर्त्यांची ही मोठी फळी तुटल्यानंतर, ओमराजे आगामी काळात आपला गड कसा राखणार आणि शिंदे गटात गेल्यावर नवीन कार्यकर्त्यांची फळी कशी उभी करणार, याकडे आता संपूर्ण महाराष्ट्राचे लक्ष लागले आहे.