BJP Politics: भाजपमधील जुने-नवे वाद पुन्हा उफाळला; प्रदेशाध्यक्ष शहरात येताच अंतर्गत धूसफूस चव्हाट्यावर
BJP Politics: स्वीकृत नगरसेवकपदांसह विविध समित्यांवर संधी देण्याची मागणी

पिंपरी : पिंपरी-चिंचवड भाजपमधील अंतर्गत नाराजी पुन्हा एकदा उफाळून आली आहे. पक्षासाठी वर्षानुवर्षे झटणाऱ्या जुन्या आणि निष्ठावंत कार्यकर्त्यांना निवडणुकीत उमेदवारीपासून दूर ठेवण्यात आल्याची खंत कार्यकर्ते उघडपणे व्यक्त करत आहेत. पक्षाच्या पडत्या काळात संघर्ष करणाऱ्या कार्यकर्त्यांना डावलले जात असून, आर्थिकदृष्ट्या सक्षम आणि अलीकडे पक्षात आलेल्यांना अधिक महत्त्व दिले जात असल्याचा सूर ज्येष्ठ कार्यकर्त्यांमधून येत आहे.
त्यामुळेच पक्षाचे प्रदेशाध्यक्ष रविंद्र चव्हाण रविवारी (दि. १५) शहरात येताच ही अंतर्गत धूसफूस पुन्हा एकदा उफाळून आली. या कार्यकर्त्यांनी चव्हाण यांच्याकडे साकडे घालत न्याय देण्याची मागणी केली आहे. त्यामुळे पिंपरी-चिंचवड भाजपमधील जुने विरुद्ध नवे हा संघर्ष पुन्हा चर्चेत आला आहे.
भाजपच्या पिंपरी-चिंचवड शहरातील ज्येष्ठ व निष्ठावंत कार्यकर्त्यांच्या वतीने प्रदेशाध्यक्ष रवींद्र चव्हाण यांना निवेदन देण्यात आले आहे. या निवेदनात पक्षातील जुन्या कार्यकर्त्यांवर झालेल्या अन्यायाचा पाढाच वाचण्यात आला आहे. २०१७ च्या महापालिका निवडणुकीत पक्षातील काही जुन्या कार्यकर्त्यांना आर्थिकदृष्ट्या सक्षम नसल्याचे कारण देत उमेदवारी नाकारण्यात आली होती. त्यावेळी किमान ५० टक्के ज्येष्ठ कार्यकर्त्यांना संधी मिळावी, अशी मागणी करण्यात आली होती.
तत्कालीन प्रदेशाध्यक्ष दानवे यांनी लोणावळा येथे जुन्या कार्यकर्त्यांची बैठक घेऊन त्यांच्या व्यथा जाणून घेतल्या होत्या. त्यावेळी पाच स्वीकृत नगरसेवक आणि २४ क्षेत्रीय प्रभाग समिती सदस्यांच्या माध्यमातून जुन्या कार्यकर्त्यांना अडीच वर्षांनंतर संधी देण्याचा शब्द देण्यात आल्याचा दावा या कार्यकर्त्यांनी केली आहे.
मात्र, या आश्वासनाची पूर्तता झाली नसल्याची खंत कार्यकर्त्यांनी व्यक्त केली आहे. पाच वर्षे आणि कोरोनाचा काळ मिळून तब्बल नऊ वर्षांचा कालावधी उलटला. या काळात अनेक निष्ठावंत कार्यकर्त्यांच्या आयुष्यातील महत्त्वाचा काळ निघून गेला. काही कार्यकर्त्यांचे निधनही झाले. तरीही त्यांच्या योगदानाची पक्षाने दखल घेतली नसल्याची नाराजी निवेदनातून व्यक्त करण्यात आली आहे.
एकीकडे पिंपरी-चिंचवडमध्ये भाजपचे संघटन मजबूत असल्याचा दावा केला जात असताना दुसरीकडे पक्षाच्या जुन्या कार्यकर्त्यांनाच प्रदेशाध्यक्षांकडे न्याय मागण्यासाठी धाव घ्यावी लागत आहे. त्यामुळे स्थानिक नेतृत्वाकडून कार्यकर्त्यांच्या नाराजीची दखल घेतली जाते की हा अंतर्गत असंतोष आणखी वाढतो, याकडे राजकीय वर्तुळाचे लक्ष लागले आहे.
तिकीट वाटपात निष्ठावंतांना डावलल्याची खंत
महापालिका निवडणुकीतील तिकीट वाटपात जुन्या आणि निष्ठावंत कार्यकर्त्यांना संधी देण्यात आली नसल्याचा आरोप करण्यात आला आहे. पक्षाच्या वाट्याला आलेल्या सात जागांवर तरी प्रत्येक निवडणुकीत पक्षासाठी जीव तोडून काम करणाऱ्या निष्ठावंत कार्यकर्त्यांना संधी द्यायला हवी होती. पक्षासाठी प्रतिकूल परिस्थितीत काम करणाऱ्यांना डावलल्याने त्यांच्यात चुकीचा संदेश जात असल्याचेही कार्यकर्त्यांनी निदर्शनास आणून दिले आहे.
गद्दारांना संधी देऊ नका
आगामी काळात स्वीकृत नगरसेवक, प्रभाग स्वीकृत सदस्य समित्या यांवर जुन्या आणि निष्ठावंत कार्यकर्त्यांची वर्णी लावून त्यांना न्याय द्यावा, अशी मागणी करण्यात आली आहे. पक्षाच्या विरोधात बंडखोरी करणाऱ्या तसेच पक्षाचा अधिकृत उमेदवार पाडण्यासाठी प्रयत्न करणाऱ्या कार्यकर्त्यांना पक्षशिस्तीचा भंग केल्याप्रकरणी निलंबित करणे आवश्यक असून त्यावर तातडीने निर्णय घेण्याची मागणी ज्येष्ठ कार्यकर्त्यांनी केली आहे.
याशिवाय पक्षविरोधी काम केलेल्या गद्दार कार्यकर्त्यांना स्वीकृत अथवा कोणत्याही शासकीय समितीवर संधी देऊ नये, अशी स्पष्ट भूमिका घेण्यात आली आहे. अशा व्यक्तींना पदे दिल्यास नवीन आणि होतकरू कार्यकर्त्यांमध्ये चुकीचा संदेश जाईल, अशी भीतीही व्यक्त करण्यात आली आहे.
घरदार सोडून काम केले हाती काहीच नाही
नवीन कार्यकर्ते आता पक्षात कार्यरत आहेत, त्यांना पुढील तीन वर्षे तरी संघटनात्मक जबाबदारी द्यावी, अशी भूमिका निवेदनात मांडण्यात आली आहे. मात्र, पक्षासाठी संघर्षमय प्रवास केलेल्या सर्वसामान्य कार्यकर्त्यांचा विचार व्हावा, अशी अपेक्षाही व्यक्त केली आहे.
घरदार सोडून पक्षासाठी काम करणारे कार्यकर्ते बाहेर पडू लागले, तर त्यांच्या कुटुंबीयांचा विचार करावा लागतो. वर्षानुवर्षे पक्षासाठी काम करूनही पदरात काहीच पडत नसेल, तर अशा कार्यकर्त्यांनी काय करायचे, असा सवाल उपस्थित करण्यात आला आहे.
Green Bridge: आंतरराष्ट्रीय हवामान परिषदेत ‘हरित सेतू’ प्रकल्पाचे कौतुक!





