पिंपरी – गेल्या काही दिवसांमध्ये राष्ट्रवादी कॉंग्रेसला लागलेल्या गळतीमुळे व्यथित झालेल्या शरद पवार यांच्या जुन्या समर्थकांनी पुन्हा एकदा सक्रिय होण्याचा निर्णय घेतला आहे. तत्कालीन “एस कॉंग्रेस’चे पदाधिकारी आणि कार्यकर्ते वयोमानानुसार राजकारणापासून दूर गेले होते. परंतु सध्याची परिस्थिती पाहता त्यांनी पुन्हा एकदा नव्या जोमाने मोट बांधण्यास सुरुवात केली आहे. या जुन्या-जाणत्या कार्यकर्त्यांनी पिंपरी-चिंचवड शहरात पत्रकार परिषद घेऊन आपली भूमिका स्पष्ट केली.

यावेळी, महाराष्ट्र स्टेट टॅक्‍स प्रॅक्‍टीशनर्सचे संस्थापक अध्यक्ष ऍड. आप्पासाहेब शिंदे, पिंपरी-चिंचवड लघु उद्योग संघटनेचे माजी अध्यक्ष तात्यासाहेब सपकाळ यांच्यासह लालासाहेब शिंदे, डॉ. काशिनाथ बामणे, मूलचंद भाट, नंदुशेठ हजारे, हरी पवार यांच्यासह पदाधिकारी उपस्थित होते.
उपस्थित पदाधिकाऱ्यांनी सांगितले की, सत्ता बदल झाल्यानंतर सरकारने उद्योग व व्यवसायाला मारक ठरणारी धोरण राबविल्यामुळे राज्यातील आणि शहरातील अनेक उद्योग स्थलांतरित झाले आहेत. उद्योग व व्यवसायाला गत वैभव प्राप्त करुन देण्याचे काम फक्‍त शरद पवारच करु शकतात, या विचाराने शरद पवार यांना पुन्हा साथ देण्यासाठी एस. कॉंग्रेसचे जुने पदाधिकारी व कार्यकर्त्यांनी पुन्हा सक्रिय होऊन काम करण्याचा निर्धार केला आहे.

पदाधिकाऱ्यांनी सांगितले की, राष्ट्रवादी कॉंग्रेसचे अध्यक्ष व तत्कालीन एस.कॉंग्रेसचे प्रमुख शरद पवार यांनी घेतलेल्या निर्णयामुळे संरक्षण क्षेत्रात महिलांना काम करण्याची संधी मिळाली, तसेच त्यांनी देशात दुसरी हरित क्रांती यशस्वी केली. पिंपरी-चिंचवड शहरात सर्वात मोठी एमआयडीसी विकसित करण्याचे श्रेयही शरद पवार यांनाच आहे.

मात्र, मागील पाच वर्षात केंद्रात आणि राज्यात सत्ताबद्दल झाल्यानंतर सरकारने व्यापारी क्षेत्राबाबत अनेक चुकीची धोरणे राबवल्यामुळे उद्योग क्षेत्रावर मंदीचे सावट पसरले आहेत. अनेक उद्योग बंद पडण्याच्या मार्गवर आहेत. ही स्थिती शरद पवारच सुधारु शकतात. त्यामुळे, राष्ट्रवादी कॉंग्रेसला बळ देण्यासाठी शरद पवार यांच्या विचारावर कार्य करणारे सर्व जुने पदाधिकारी व कार्यकर्ते एकत्र येत असल्याचे स्पष्ट करण्यात आले.