Oil prices fall: आखाता मधील युद्ध समाप्त होण्याची शक्यता वाढल्यामुळे खनिज तेलाचे दर बरेच कमी झाले आहेत. यामुळे भारताला खनिज तेल आयातीसाठी जास्त परकीय चलन खर्च करावे लागणार नाही. अशा परिस्थितीत मंगळवारी रुपयाचा भाव 36 पैशांनी वधारून 91.85 रुपये प्रति डॉलर या पातळीवर आला. सोमवारी रुपयाचा भाव विक्रमी पातळीपर्यंत कोसळला होता. दरम्यानच्या काळात भारतीय शेअर बाजाराचे निर्देशांक एक टक्क्यांनी वाढले. यामुळे रुपयाच्या मूल्यात सुधारणा होण्यास मदत झाली असे विश्लेषकांनी सांगितले. आमचे उद्दिष्ट साध्य झाल्यामुळे आता इराणवर हल्ले करण्याची गरज कमी झाली आहे असे अमेरिकेचे अध्यक्ष डोनाल्ड ट्रम्प यांनी सांगितले. जागतिक ऊर्जा सुरक्षिततेचे बाबत त्यांनी रशियाचे अध्यक्ष ब्लादिमीर पुतीन यांच्याबरोबर दूरध्वनीवरून चर्चा केली. त्यामुळे आखातातील युद्ध मंदावणार असल्याचे दिसून येते. याचा थेट परिणाम खनिज तेलाच्या किमतीवर झाला खनिज तेलाचे दर 8.31 टक्क्यांनी कोसळून 90.74 डॉलर प्रति पिंपापर्यंत खाली आले. काल काही काळ खनिज तेलाचे दर 120 डॉलरपर्यंत वाढले होते. हेही वाचा – कच्च्या तेलाच्या किमती घसरल्या; सेन्सेक्स 639 अंकांनी वधारला, निफ्टी 24,261 वर बंद डोनाल्ड ट्रम्प यांनी केलेल्या वक्तव्यामुळे डॉलरचा भावही वधारला आणि डॉलर इंडेक्स 0.52 टक्क्यांनी कमी होऊन 98.85 अंकावर गेला. डॉलर घसरल्यामुळे रुपयासह इतर अनेक देशांच्या चलनाच्या मूल्यात वाढ होण्यास मदत झाली असल्याचे सांगितले जाते. जर युद्ध या आठवड्यात बंद झाले तर खनिज तेलाच्या किमती पुन्हा 70 डॉलरच्या जवळपास येतील. अशा अवस्थेत रुपयाचे मूल्य पुन्हा वधारण्याची शक्यता विश्लेषकांनी व्यक्त केली. भारताला खनिज तेलात जात तुटवडा नसला तरी खनिज तेलाच्या किमती वाढत असल्यामुळे रुपयाच्या मूल्यावर गेल्या आठवड्यात बराच दबाव आला होता.
