Oh My Dog : 7 ऑगस्ट रोजी देशभरातील चित्रपटगृहांमध्ये प्रदर्शित होणाऱ्या ‘ओह माय डॉग’ या चित्रपटाच्या प्रदर्शनापूर्वी पुण्यात आयोजित करण्यात आलेल्या विशेष प्री-रिलीज स्क्रीनिंगला प्रेक्षकांचा उत्स्फूर्त प्रतिसाद मिळाला. या विशेष शोला अभिनेते जितेंद्र जोशी आणि विजय मिश्रा यांनी उपस्थित राहून प्रेक्षकांशी संवाद साधला तसेच चित्रपटाबाबतच्या प्रतिक्रिया जाणून घेतल्या.

स्क्रीनिंगनंतर प्रेक्षकांनी चित्रपटाच्या भावनिक कथानकाचे, कलाकारांच्या प्रभावी अभिनयाचे आणि माणूस व कुत्रा यांच्यातील निःशब्द पण हृदयस्पर्शी नात्याच्या संवेदनशील मांडणीचे भरभरून कौतुक केले. अनेक प्रेक्षकांनी हा चित्रपट संपूर्ण कुटुंबासोबत पाहण्यासारखा असल्याचे सांगितले. प्रेम, करुणा आणि सहानुभूतीचा संदेश देणारी ही कथा सर्व वयोगटातील प्रेक्षकांच्या मनाला भिडेल, असे मतही त्यांनी व्यक्त केले.

या प्रतिसादाबद्दल समाधान व्यक्त करताना जितेंद्र जोशी आणि विजय मिश्रा यांनी प्रेक्षकांचे आभार मानले. चित्रपट प्रदर्शित होण्यापूर्वीच प्रेक्षक या कथेशी भावनिक नाते जोडताना दिसत असल्याचे पाहणे हा कलाकार म्हणून अत्यंत आनंददायी अनुभव असल्याचे त्यांनी सांगितले.

यावेळी ते म्हणाले, “प्रेक्षकांना ‘ओह माय डॉग’सोबत हसताना, आनंद घेताना आणि भावनिकरित्या जोडले जाताना पाहणे आमच्यासाठी अत्यंत समाधानकारक अनुभव आहे.”

चित्रपटाचे दिग्दर्शक अमित राय यांनीही प्रेक्षकांच्या सकारात्मक प्रतिसादाबद्दल आनंद व्यक्त केला. “हा चित्रपट प्रेम, करुणा आणि माणूस व प्राण्यांमधील निःशब्द पण अतूट नात्याचा उत्सव आहे. 7 ऑगस्टपासून देशभरातील प्रेक्षकांनी हा चित्रपट चित्रपटगृहात अनुभवावा, याची आम्हाला उत्सुकता आहे,” असे त्यांनी सांगितले.

पुण्यातील सकारात्मक प्रतिसादामुळे चित्रपटाविषयीची उत्सुकता आणखी वाढली असून, सध्या देशातील विविध शहरांमध्ये चित्रपटाची प्रचारमोहीम सुरू आहे. अधिकाधिक प्रेक्षकांपर्यंत ही भावनिक कथा पोहोचवण्यावर निर्मात्यांचा भर आहे.

बाबूलाल बिस्कोप आणि थिंकिंग हॅट्स एंटरटेनमेंट यांच्या बॅनरखाली अमित राय, राजेश भारद्वाज आणि सना वारसी यांनी या चित्रपटाची निर्मिती केली आहे. चित्रपटात माही राय, पंकज त्रिपाठी, गीता अग्रवाल शर्मा, राजेश कुमार, पवन मल्होत्रा, सुलाख्याना बरुआ, विजय मिश्रा यांच्यासह कॅनाईन स्टार्स ऑस्कर आणि ब्रुनो महत्त्वाच्या भूमिकांमध्ये दिसणार आहेत. विशेष म्हणजे या चित्रपटात 250 हून अधिक कुत्र्यांचा सहभाग असून, ‘ओह माय डॉग’ हा चित्रपट 7 ऑगस्ट रोजी देशभरातील चित्रपटगृहांमध्ये प्रदर्शित होणार आहे.