शिरूर : जमिनीच्या वादात मदत करण्याच्या नावाखाली एका विवाहित महिलेचा विनयभंग करीत, चक्क शरीरसंबंधाची मागणी केल्याचा धक्कादायक प्रकार संविदणे (ता. शिरूर) येथे उघडकीस आला आहे. “शरीरसंबंध ठेवले तर तुझ्या सासऱ्यांची प्रांत कार्यालयातील जमीनविषयक तक्रार मागे घेण्यासाठी मदत करतो,” अशा स्वरूपाची मागणी केल्याची तक्रार सदर महिलेने केली आहे.

या प्रकरणी ग्राहक कल्याण फाऊंडेशनचे पदाधिकारी सुभाष नाथा कामठे (रा. कामठेवाडी, संविदणे) याच्याविरुद्ध शिरूर पोलिसांत गुन्हा दाखल करून अटक करण्यात आले आहे.

पीडीत महिलेच्या तक्रारीनुसार, त्यांच्या पतीच्या नावावर असलेली शेतजमीन त्यांचे यांना परत मिळावी, यासाठी पुणे येथील प्रांत कार्यालयात जमीनविषयक तक्रार दाखल करण्यात आली आहे. आरोपी सुभाष कामठे हा सासऱ्यांना या कामासाठी पुणे येथे घेऊन जात असल्याचेही तक्रारीत नमूद आहे.

सुमारे दीड वर्षापूर्वी आरोपी फिर्यादीच्या घराजवळ आला असता, “तू मला खूप आवडतेस, मला तुझ्यासोबत शरीरसंबंध ठेवायचे आहेत,” अशा अश्लील स्वरूपाच्या मागणीचा आरोप फिर्यादीने केला आहे. त्यावेळी महिलेने आरोपीला खडसावून हाकलून दिल्याचे तक्रारीत म्हटले आहे.

मात्र त्यानंतरही आरोपी घराजवळून मोटारसायकलवरून ये-जा करताना आपल्याकडे वाईट नजरेने पाहत असल्याचा आरोप महिलेने केला आहे. घरातील परिस्थितीमुळे सुरुवातीला हा प्रकार पतीला किंवा इतर कोणालाही सांगितला नसल्याचेही तिने पोलिसांना सांगितले.

दरम्यान, ९ सप्टेंबर रोजी दुपारी सुमारे १२ वाजता फिर्यादी घराजवळ जनावरांचे काम करीत असताना आरोपी लाल रंगाच्या मोटारसायकलवरून तेथे आला.यावेळी आरोपीने पुन्हा शरीरसंबंधाची मागणी केली. तसेच, ही मागणी मान्य केल्यास सासऱ्यांनी प्रांत कार्यालयात केलेली जमीनविषयक तक्रार मागे घेण्यासाठी मदत करण्याचे आमिष दाखविल्याचा गंभीर आरोप करण्यात आला आहे.या प्रकारामुळे संतप्त झालेल्या महिलेने आरोपीला मोठ्याने जाब विचारला. त्यानंतर आरोपी मोटारसायकलवरून निघून गेल्याचे फिर्यादीने सांगितले.

आरोपी आपला पाठलाग करीत असून मोबाईल फोनमध्ये आपले फोटो व शूटिंग काढत असल्याचा आरोपही महिलेने केला आहे. या कथित प्रकारामुळे मानसिक त्रास, भीती आणि लज्जा निर्माण झाल्याचे तक्रारीत नमूद करण्यात आले आहे.

घटनेनंतर पती घरी आल्यानंतर महिलेने त्यांना संपूर्ण प्रकार सांगितला. व दोन दिवसानंतर पोलीस ठाण्यामध्ये तक्रार दाखल केली आहे.या प्रकरणी सुभाष कामटे याला शिरूर पोलिसांनी अटक केली असून या गुन्ह्याचा पुढील तपास सहाय्यक फौजदार राजेंद्र चव्हाण हे करीत आहेत.