October Heat: सप्टेंबर महिन्याच्या अखेरीस झालेल्या हलक्या पावसानंतर आता पिंपरी-चिंचवड शहरात ऑक्टोबर हिटचा चटका जाणवू लागला आहे. गेल्या काही दिवसांपासून शहराच्या कमाल तापमानात वाढ झाली असून, दुपारच्या वेळी उन्हाची तीव्रता वाढल्याने नागरिकांना उकाड्याचा सामना करावा लागत आहे. रविवारी (दि. ४) चिंचवड परिसरात कमाल तापमान सुमारे ३४.७ अंश सेल्सिअस नोंदले गेले.

पुढील काही दिवसांत शहरातील कमाल तापमान ३६ ते ३७ अंशांपर्यंत पोहोचण्याची शक्यता हवामान विभागाने वर्तविली आहे. ऑक्टोबरच्या सुरुवातीलाच तापमानात झालेली वाढ ही मान्सूनच्या परतीनंतर आकाश निरभ्र होणे आणि पावसाच्या प्रमाणात घट होण्याशी संबंधित आहे. पावसाचा प्रभाव कमी झाल्याने दिवसभर सूर्यप्रकाश अधिक तीव्रतेने जाणवत आहे. त्यातच वातावरणातील उर्वरित आर्द्रतेमुळे प्रत्यक्ष तापमानापेक्षा उकाडा अधिक जाणवत आहे.

पुणे आणि परिसरात ऑक्टोबरच्या सुरुवातीपासूनच कमाल तापमान सरासरीपेक्षा अधिक राहण्याची स्थिती आहे. भारतीय हवामानशास्त्र विभागाच्या माहितीनुसार, ऑक्टोबर महिन्यात राज्यातील अनेक भागांत कमाल तापमान सरासरीपेक्षा अधिक राहण्याची शक्यता आहे. शहरात सकाळच्या वेळी वातावरण तुलनेने आल्हाददायक असले तरी सकाळी दहा वाजल्यानंतर उन्हाची तीव्रता वाढत आहे. दुपारी रस्त्यावर वर्दळ असलेल्या भागांत उष्णतेचा चटका अधिक जाणवतो.

विशेषतः दुचाकीस्वार, पादचारी, बांधकाम कामगार तसेच मैदानी काम करणाऱ्या नागरिकांना या वाढत्या उष्णतेचा त्रास होत आहे. दरम्यान, येत्या काही दिवसांत पावसाची शक्यता कमी असून आकाश मुख्यतः निरभ्र राहण्याचा अंदाज आहे. त्यामुळे शहरातील तापमानात आणखी वाढ होण्याची शक्यता असून, नागरिकांनी दुपारच्या वेळेत अनावश्यक उन्हात जाणे टाळावे, पुरेसे पाणी प्यावे आणि उष्णतेपासून बचावासाठी आवश्यक काळजी घ्यावी, असे आवाहन करण्यात येत आहे.