मुंबई  – ‘राज्यातील रस्ते बांधणीच्या कामात शिवसैनिकांकडून अडथळे निर्माण केले जात असून हे असेच सुरू राहिल्यास महाराष्ट्रातील कामे थांबवावी लागतील,’ असा इशारा देणारे पत्र केंद्रीय रस्ते वाहतूक मंत्री नितीन गडकरी यांनी मुख्यमंत्री उध्दव ठाकरे यांना पाठवल्याने खळबळ उडाली आहे. “महाराष्ट्राचे नुकसान होऊ नये म्हणून आपण यात त्वरीत हस्तक्षेप करून मार्ग काढावा,’ अशी विनंतीही या पत्रात करण्यात आली आहे.  

यावर शिवसेनेच्या खासदार भावना गवळी यांनी गडकरींची काही लोकांकडून दिशाभूल केली जात असल्याचं सांगत राष्ट्रीय महामार्गाचा विषय असल्याने त्यांची भेट घेऊन सगळ्या गोष्टी सांगणार असल्याचं  वृत्त माध्यमांशी बोलताना म्हटलं आहे. त्या म्हणाल्या, “पुलाचं काम आहेत, तर ते कोर्टात गेले आहेत. रस्ता चिरलेला आहे…काम खराब झालं आहे. अशा कामांची चौकशी करतील अशी आम्हाला अपेक्षा आहे,” असं यावेळी त्यांनी म्हटलं. 

नेमकं काय आहे प्रकरण 

अकोला, नांदेड, वाशिम, उस्मानाबाद या जिल्ह्यांना जोडणाऱ्या रस्त्यांची कामे सुरू आहेत. चौपदरीकरणाचे काम सुरू आहे. मात्र, यात शिवसैनिक अडथळे आणत आहेत. कंत्राटदारांना धमक्‍या देत आहेत, याकडे मुख्यमंत्र्यांचे लक्ष वेधले आहे.

अकोला आणि नांदेड या 202 किमीच्या राष्ट्रीय महामार्गावर चौपदरीकरणाची कामं चार टप्प्यांत सुरू आहेत. यात गेडशी ते वाशिम असं वाशिम शहरासाठी बायपास (लांबी 12 किमी) निर्माण करण्याचं काम सुद्धा समाविष्ट आहे. परंतु, बायपास व मुख्य रस्त्याचं काम शिवसेनेच्या स्थानिक लोकप्रतिनिधींनी थांबवले आहे. या प्रकारावर गडकरी यांनी तीव्र नाराजी व्यक्त करून मुख्यमंत्र्यांनी हस्तक्षेप करावा व यातून मार्ग काढावा, अशी अपेक्षा  पत्रातून व्यक्त केली.

मालेगाव ते रिसोड या राष्ट्रीय महामार्गाचे काम एक पूल वगळता पूर्णत्वास आलेले आहे. या लांबीमध्ये पैनगंगा नदीवर उंच पुलाचं काम अर्धवट स्वरुपात आहे. ते पूर्ण करण्यासाठी कंत्राटदाराला मज्जाव केला जात आहे. काम सुरू केल्यास कार्यकर्ते येऊन धमक्‍या देतात. त्यामुळं कंत्राटदाराने काम थांबवण्याची परवानगी मागितली आहे, असे त्यांनी पत्रात नमूद केले आहे.

पूलगाव-कारंजा-मालेगाव-मेहकर-सिंदखेडराजा हा राष्ट्रीय महामार्गाच्या दुरुस्तीचं काम काम जवळपास पूर्ण झाले आहे. वाशिम जिल्ह्यात सेलू बाजार गावातून जाणाऱ्या रस्त्याचं काम शिवसैनिकांनी थांबवले होते, अशी माहिती मला देण्यात आली. कंत्राटदाराने पुन्हा काम सुरू केले असता शिवसेना कार्यकर्त्यांनी मशिनरीची जाळपोळ करून अधिकारी, कर्मचारी आणि कामगारांमध्ये दहशत निर्माण केली.

त्यामुळे ते काम पुन्हा बंद पडले आहे. त्यामुळं वाशिम जिल्ह्यातील राष्ट्रीय महामार्गावरील कामे यापुढंही सुरू ठेवावीत का? याबद्दल आम्ही गांभीर्यानं विचार करत आहोत. ही कामं अर्धवट सोडल्यास वाहतुकीसाठी धोकादायक ठरतील.

हे असेच चालत राहिल्यास महाराष्ट्रातील राष्ट्रीय महामार्गावरील कामं मंजूर करण्याच्या संदर्भात आमच्या मंत्रालयाला विचार करावा लागेल. यामुळं महाराष्ट्राचं आणि जनतेचं नुकसान होईल. लोकांच्या दृष्टीने आम्ही अपराधी ठरू, असे त्यांनी या पत्रात नमूद केले आहे.