बीड : बीड जिल्ह्यातील मस्साजोगचे सरपंच देशमुख हत्याप्रकरणी अंगाचा थरकाप उडवणारी माहिती समोर आली आहे. आरोपी महेश केदारने स्वतःच्या मोबाईलमध्ये देशमुखांना मारहाण करताना तब्बल 15 व्हिडिओ आणि 8 फोटो घेतले होते. हे सर्व 15 व्हिडिओ आणि 8 फोटो दोषारोपपत्रात जोडण्यात आले होते. हा सर्व डेटा पोलिसांच्या हाती लागला असून तो न्यायालयासमोर सादर करण्यात आला आहे. अशातच आता पोलिसांनी ठरवले असते तर सरपंच संतोष देशमुख यांचा जीव वाचला असता का? हा प्रश्न विचारण्याचे कारण संतोष देशमुख केज वरून मस्साजोगकडे प्रवास करताना सोबत असलेल्या प्रत्यक्षदर्शीचा जबाब ठरला आहे. सरपंच संतोष देशमुख यांचे ज्या केज-बीड रस्त्यावरील टोल नाक्यावरून अपहरण झाले, त्यावेळी सरपंच यांची गाडी चालवत असलेल्या व्यक्तीला कोयता लावला गेला आणि अपहरण झाले. त्यानंतर सदरील व्यक्तीने सरपंच यांचे बंधू धनंजय देशमुख यांना घटनाक्रम सांगितला. धनंजय यांनी तात्काळ पोलीस स्टेशनमध्ये जाण्यास सांगतीले. सदरील प्रत्यक्षदर्शी पोलीस स्टेशनला गेले, मात्र त्यांना पोलीस स्टेशनमध्ये तीन ते साडेतीन तास बसून ठेवण्याचे त्यांनी आपल्या जबाबमध्ये म्हटले आहे. नवीन कायदा आहे, पुस्तक बघून जबाब लिहावा लागतो, असे कारण दिल्याचही प्रत्यक्षदर्शीने आपल्या जबाबामध्ये सांगितले आहे. तसेच पोलीस स्टेशनमध्ये पोलीस स्टेशनचे पीआय महाजन आणि आणखीन एक बनसोडे नावाचे अधिकारी त्यावेळी उपस्थित होते. विशेष म्हणजे घटनेच्या काही दिवसांपूर्वी आवादा कंपनीने या आरोपीच्या विरोधात कंपनीत येऊन धमकावल्याची तक्रार दिली होती. घटनेचे गांभीर्य पीआय यांना माहिती होते, त्यांनी ठरवले असते तर सहा आरोपींचे मोबाईल, लोकेशन दहा मिनिट फार तर एक तासात घेता येऊ शकले असते असा दावा देखील या प्रत्यक्षदर्शीने केला आहे. त्यामुळे केज पोलीस अडचणीत येण्याची शक्यता आहे. देशमुखांच्या तोंडात सुग्रीव कराडचे नाव दरम्यान, सरपंच देशमुख यांना मारहाण करीत असतानाच सुग्रीव कराड याचे नाव संतोष देशमुख यांच्या तोंडातून आले होते, सुग्रीव कराड यांनी त्या दिवशी आवादा कंपनीच्या आवारात सुदर्शन घुले आणि इतर कंपनीला मारहाण करायला लावले होते. अशी देखील माहिती आहे. हीच बाब सुदर्शन घुले आणि त्याच्या इतर गॅंगला सहन झालेली नव्हती. सुग्रीव कराड कोण आहे? सुग्रीव कराड हा बीड जिल्ह्यातील केज तालुक्यातील रहिवासी आहे आणि स्थानिक पातळीवर गुंड म्हणून ओळखला जातो. त्याने आमदार धनंजय मुंडे आणि वाल्मिक कराड यांच्यासोबत राजकीय काम केलं आहे. केज नगरपंचायत निवडणुकीत त्याने खासदार बजरंग सोनवणेंच्या मुलीचा (डॉ. हर्षदा) पराभव करून आपली ताकद दाखवली होती. लोकसभा निवडणुकीपर्यंत तो सोनवणेंचा कट्टर विरोधक होता, पण आता तो त्यांच्यासोबत आहे. राजकीय प्रभाव असलेला सुग्रीव याने पंचायत समिती निवडणुकीत आपल्या आईला निवडून आणलं आहे. त्याच्या या पार्श्वभूमीमुळे संतोष देशमुख हत्येप्रकरणात त्याच्या सहभागाबाबत अनेक प्रश्न उपस्थित होत आहेत.
