NSE IPO : शेअर बाजारातील गुंतवणूकदारांचे लक्ष लागून राहिलेल्या नॅशनल स्टॉक एक्सचेंजच्या (NSE) महाआयपीओबाबत महत्त्वाची अपडेट समोर आली आहे. एनएसईने दाखल केलेल्या ड्राफ्ट रेड हेरिंग प्रॉस्पेक्टसला (DRHP) लवकरच बाजार नियामक सेबीकडून मंजुरी मिळण्याची शक्यता आहे. सेबीचे अध्यक्ष तुहिन कांता पांडे यांनी याबाबत संकेत दिले आहेत.

14.89 कोटी शेअर्सची विक्री –

एनएसईने जूनमध्ये आयपीओसाठी DRHP दाखल केला होता. हा आयपीओ पूर्णपणे ‘ऑफर फॉर सेल’ (OFS) स्वरूपाचा असेल. म्हणजेच एनएसईकडून कोणतेही नवीन शेअर्स जारी केले जाणार नाहीत. विद्यमान भागधारकांकडून सुमारे 6 टक्के हिस्सा विकला जाणार असून, एकूण 14.89 कोटी (148.9 दशलक्ष) शेअर्स विक्रीसाठी उपलब्ध असतील.

या विक्रीमध्ये स्टेट बँक ऑफ इंडिया (SBI), एमएस स्ट्रॅटेजिक (मॉरिशस) लिमिटेड, कॅनडा पेन्शन प्लॅन इन्व्हेस्टमेंट बोर्ड, अरंडा इन्व्हेस्टमेंट्स (मॉरिशस), बँक ऑफ बडोदा, स्टॉक होल्डिंग कॉर्पोरेशन ऑफ इंडिया, जनरल इन्शुरन्स कॉर्पोरेशन ऑफ इंडिया, न्यू इंडिया अॅश्युरन्स, नॅशनल इन्शुरन्स कंपनी आणि युनायटेड इंडिया इन्शुरन्स कंपनी यांचा समावेश आहे.

मंजुरीला तीन आठवड्यांचा विलंब –

एनएसईच्या DRHP ला ऑगस्टच्या सुरुवातीलाच मंजुरी मिळण्याची शक्यता होती. मात्र, भागधारकांच्या यादीत बदल झाल्याने प्रक्रियेला सुमारे तीन आठवड्यांचा विलंब झाला. विक्री करणाऱ्या भागधारकांच्या यादीत एसबीआय कॅपिटल मार्केट्स लिमिटेडचे नाव नव्याने समाविष्ट करण्यात आले.

5.26 लाख कोटींचे मूल्यांकन –

ब्लूमबर्गच्या अहवालानुसार, एनएसई या आयपीओद्वारे सुमारे 5.26 लाख कोटी रुपये म्हणजेच जवळपास 55 अब्ज डॉलर मूल्यांकनाचे लक्ष्य ठेवत आहे. ट्रेडिंग व्हॉल्यूमच्या दृष्टीने एनएसई हे जगातील सर्वात मोठे डेरिव्हेटिव्ह एक्सचेंज आहे.

आंतरराष्ट्रीय गुंतवणूकदारांचे लक्ष वेधण्यासाठी एनएसईने बोस्टन, न्यूयॉर्क, सॅन फ्रान्सिस्को, लंडन, सिंगापूर आणि हाँगकाँग येथे इन्व्हेस्टर मीटिंग्ज घेतल्या. ब्लॅकरॉक, कॅपिटल ग्रुप, जीक्यूजी पार्टनर्स, जानस हेंडरसन ग्रुप आणि ऑलस्प्रिंग ग्लोबल इन्व्हेस्टमेंट्ससह सुमारे 120 मोठ्या जागतिक गुंतवणूकदारांनी या रोडशोमध्ये सहभाग घेतला.

जागतिक एक्सचेंज कंपन्यांमध्ये मोठी झेप –

एनएसईने 55 अब्ज डॉलरचे लक्ष्यित मूल्यांकन गाठल्यास, बाजारमूल्यानुसार ते जगातील सहाव्या क्रमांकाचे मोठे एक्सचेंज ऑपरेटर ठरू शकते. अशा स्थितीत ते लंडन स्टॉक एक्सचेंज ग्रुपच्या मागे, तर नॅस्डॅकच्या पुढे राहू शकते. सध्या सीएमई ग्रुपचे मूल्यांकन सुमारे 97 अब्ज डॉलर आणि इंटरकॉन्टिनेंटल एक्सचेंजचे 86.9 अब्ज डॉलर आहे.

अस्वीकरण : गुंतवणुकीसंदर्भातील शिफारसी, सूचना आणि मते संबंधित तज्ज्ञांची वैयक्तिक आहेत. शेअर बाजारातील गुंतवणूक ही जोखमीच्या अधिन आहे. गुंतवणूक करताना तज्ज्ञांचा जरूर सल्ला घ्या. दैनिक प्रभात कधीही कोणाला गुंतवणूकीचा सल्ला देत नाही.