T20 World Cup 2024 : पहिला उपांत्य सामना दक्षिण आफ्रिका आणि अफगाणिस्तान यांच्यात होणार आहे, तर दुसऱ्या उपांत्य फेरीच्या सामन्यात भारत आणि इंग्लंड आमनेसामने असतील. आफ्रिकन संघ तिसऱ्यांदा T20 विश्वचषकाचा उपांत्य सामना खेळणार आहे. याआधी 2009 आणि 2014 च्या विश्वचषकातही हा संघ उपांत्य फेरीत पोहोचला होता. एडन मार्करामच्या नेतृत्वाखाली हा संघ 2024 च्या विश्वचषकात आतापर्यंत अपराजित राहिला आहे. आता ऑस्ट्रेलियन दिग्गज ब्रॅड हॉगने या स्पर्धेतील विजेत्याबाबत आश्चर्यकारक भविष्यवाणी केली आहे.

स्टार स्पोर्ट्सशी बोलताना ब्रॅड हॉग म्हणाला, “मला वाटते की यावेळी दक्षिण आफ्रिका जिंकेल. त्यांच्याकडे खूप मजबूत संघ आहे. मला विश्वास आहे की जर आफ्रिकेने निर्भय राहून उपांत्य फेरीचे आव्हान पेलले तर हा संघ अंतिम फेरीत विजय मिळवेल आणि विश्वविजेता बनेल. या संघात खूप चांगले संयोजन, आक्रमकता आहे आणि सर्व खेळाडू विनम्र आहेत. मला कर्णधार म्हणून एडन मार्कराम आवडतो, जो संयमाने अचूक निर्णय घेतो. संघाला निर्भयपणे आणि परिस्थितीशी जुळवून घेत क्रिकेट खेळावे लागेल.”

T20 World Cup 2024 : हरला तो संपला, उपांत्यफेरीतील 4 संघ निश्चित..! जाणून घ्या…कोण-कोणाशी, कधी अन् कुठे भिडणार, याविषयीचे सर्व डिटेल्स एका क्लिकवर…

अफगाणिस्तानचे आव्हान सोपे नाही

2024 च्या T20 विश्वचषक स्पर्धेत अफगाणिस्तानही अव्वल संघ म्हणून उदयास आला आहे. राशिद खानच्या नेतृत्वाखाली अफगाणिस्तानच्या संघाने न्यूझीलंडला ग्रुप स्टेजमध्ये पहिल्यांदाच पराभूत केले होते. अफगाणिस्तानने किवी संघाचा 84 धावांनी पराभव केला होता. सुपर-8 टप्प्यात ऑस्ट्रेलियाचा 21 धावांनी पराभव करून उपांत्य फेरी गाठण्याच्या आपल्या आशा जिवंत ठेवल्या. त्यानंतर दडपण भरलेल्या सामन्यात अफगाणिस्तानने बांगलादेशचा 8 धावांनी पराभव करत उपांत्य फेरीत प्रवेश केला. हा संघ मोठ्या लयीत आहे, त्यामुळे दक्षिण आफ्रिकेसाठी हे आव्हान पेलणे सोपे जाणार नाही.