Keerthy Suresh : दाक्षिणात्य चित्रपटसृष्टीतील लोकप्रिय अभिनेत्री कीर्ती सुरेश सध्या तिच्या आगामी ‘अक्का’ या चित्रपटामुळे चर्चेत आहे. नुकताच या चित्रपटाचा ट्रेलर प्रदर्शित झाला. त्यातील कीर्तीचा दमदार आणि वेगळा लूक चाहत्यांना थक्क करणारा ठरला आहे. याचदरम्यान, अभिनेत्रीने आपल्या करिअरमधील एका कठीण काळाबद्दल महत्त्वाचा खुलासा केला आहे. ‘महानटी’ चित्रपटाला मोठे यश मिळाल्यानंतरही तिला जवळपास सहा महिने काम मिळाले नव्हते, असे तिने सांगितले.

कीर्ती सुरेशला ‘महानटी’ या चित्रपटामुळे प्रचंड लोकप्रियता मिळाली. या चित्रपटातील तिच्या अभिनयाचे सर्वत्र कौतुक झाले आणि ती रातोरात स्टार बनली. या यशानंतर आपल्याला अनेक चित्रपटांच्या ऑफर्स मिळतील, अशी अपेक्षा तिला होती. मात्र, प्रत्यक्षात ‘महानटी’नंतर जवळपास सहा महिने तिच्याकडे कोणतेही काम नव्हते.

एका वृत्तवाहिनीला दिलेल्या मुलाखतीत कीर्तीने या काळातील अनुभव सांगितले. याबद्दल बोलताना तिला काम का मिळाले नाही याविषयी आपले मत व्यक्त केले. ती  म्हणाली की, “लोकांना तिच्यासाठी योग्य भूमिका कोणत्या असतील, हे समजत नव्हते. ‘महानटी’नंतर लोक तिच्याकडे पूर्वीसारखे पाहत नव्हते. तिच्यासाठी अधिक सशक्त आणि आव्हानात्मक भूमिका लिहिण्याची गरज त्यांना जाणवत होती. ही गोष्ट तिने सकारात्मक पद्धतीने स्वीकारली.”

‘अक्का’मधून कीर्तीचा वेगळा अंदाज

आता कीर्ती सुरेश ‘अक्का’ या आगामी चित्रपटातून प्रेक्षकांच्या भेटीला येणार आहे. या चित्रपटात तिच्यासोबत अभिनेत्री राधिका आपटेही महत्त्वाच्या भूमिकेत दिसणार आहे. ट्रेलरमध्ये थरारक प्रसंग आणि कीर्तीचा वेगळा अंदाज पाहायला मिळत आहे.

‘अक्का’ हा चित्रपट ३० ऑक्टोबर रोजी नेटफ्लिक्सवर प्रदर्शित होणार आहे. ‘दसरा’, ‘रेमो’, ‘मामन्नन’ आणि ‘सानी कायिधम’ यांसारख्या चित्रपटांतून आपली अभिनयक्षमता कीर्तीने दाखवून दिली आहे.

Breast Cancer In Men: पुरुषांनाही होऊ शकतो ब्रेस्ट कॅन्सर! छातीतील ‘या’ बदलांकडे दुर्लक्ष करू नका, वेळीच ओळखा लक्षणे