Maharashtra Weather : महाराष्ट्रातील नागरिकांसाठी नोव्हेंबर महिना ‘थंडी’ऐवजी ‘उष्णता आणि पावसाचा’ सरप्राइज घेऊन येणार असल्याचा अंदाज भारतीय हवामान विभागाने (IMD) वर्तवला आहे. यंदा हिवाळा सुरू होत असतानाही किमान तापमान सरासरीपेक्षा जास्त राहण्याची शक्यता असल्याने थंडीचा कडाका कमी जाणवेल. त्याचवेळी, राज्यात आणि देशभरात सरासरीपेक्षा जास्त पावसाची शक्यता आहे.

IMD च्या मासिक अंदाजानुसार, नोव्हेंबर महिन्यात देशाच्या बहुतांश भागांत विशेषतः महाराष्ट्रासह मध्य, पश्चिम आणि पूर्व भारतात किमान तापमान सरासरीपेक्षा १ ते २ डिग्री सेल्सिअस जास्त राहण्याची शक्यता आहे. वायव्य भारतातील काही भाग वगळता उर्वरित भागांत रात्रीची उष्णता वाढेल.

महाराष्ट्रात मुंबई, पुणे, नाशिकसारख्या शहरांत किमान तापमान २३ ते २६ डिग्री सेल्सिअसपर्यंत राहू शकते, ज्यामुळे ‘नोव्हेंबर हीट’ सारखी स्थिती निर्माण होईल. हिवाळा हलका राहील असा अंदाज आहे, कारण ला निना परिस्थिती डिसेंबर २०२५ ते फेब्रुवारी २०२६ पर्यंत कायम राहण्याची शक्यता आहे, ज्यामुळे सामान्यपेक्षा जास्त उष्णता वाढेल.

मुंबईसारख्या किनारी भागांत २ नोव्हेंबरला किमान २५ डिग्री आणि कमाल ३३ डिग्री तापमानाची शक्यता आहे, तर पुणे आणि मध्य महाराष्ट्रात २० ते २९ डिग्रीपर्यंत. आर्द्रतेचे प्रमाण ८०-९०% पर्यंत राहील.

पावसाळा संपलेला असतानाही नोव्हेंबरमध्ये पावसाचा जोर कायम राहण्याची शक्यता आहे. IMD नुसार, देशभरात सरासरीपेक्षा जास्त पाऊस पडेल, जरी वायव्य भारत आणि दक्षिण द्वीपकल्पातील काही भागांत कमी पाऊस अपेक्षित असेल.

महाराष्ट्रात कोकण, मध्य महाराष्ट्र आणि मराठवाड्यात १ ते ४ नोव्हेंबरपर्यंत हलका ते मध्यम पाऊस, वादळ आणि विजांसह पडण्याची शक्यता आहे. मुंबईत २ नोव्हेंबरला ६३% पावसाची शक्यता असून, दुपारनंतर ५०% पेक्षा जास्त. सातारा, कोल्हापूर, सांगलीसारख्या जिल्ह्यांतही पिवळा अलर्ट जारी करण्यात आला आहे.