Nitish Kumar : बिहार विधानसभा निवडणुकीत एनडीएने मिळवलेल्या मोठ्या विजयानंतर नितीश कुमार (Nitish Kumar) यांनी मुख्यमंत्रिपदाची शपथ घेतली खरी; परंतु त्यानंतर घडलेल्या वेगाने नाट्यमय घडामोडींनी राजकीय वातावरण ढवळून निघाले. नितीश कुमार यांनी मुख्यमंत्रिपदाचा राजीनामा दिला आणि १५ एप्रिल २०२६ रोजी भाजप नेते सम्राट चौधरी यांनी बिहारच्या मुख्यमंत्रिपदाची धुरा सांभाळली.

या अनपेक्षित सत्तांतरानंतर जनता दल युनायटेडच्या (जेडीयू) गोटात तीव्र नाराजी पसरल्याची चर्चा राजकीय वर्तुळात रंगू लागली. समान नागरी संहितेच्या (UCC) मुद्द्यावरही जेडीयूने भाजपपासून स्पष्ट अंतर राखत आपले मतभेद उघड केले होते. आता हा अंतर्गत तणाव थेट बिहारबाहेर जाऊन पोहोचला असून, नितीश कुमार यांनी भाजपला एक मोठा धक्का दिला आहे.

२०२७ मध्ये होणाऱ्या पंजाब विधानसभा निवडणुकीसाठी जेडीयूने आत्तापासूनच स्वतंत्र रणनीती आखत भाजपला थेट आव्हान दिले आहे. एनडीएचा प्रमुख घटक पक्ष असूनही जेडीयूने (Nitish Kumar) पंजाबमध्ये भाजपशी काडीमोड घेत थेट ‘शिरोमणी अकाली दल श्री आनंदपूर साहिब’ (SADSAS) या पक्षासोबत युतीची घोषणा केली. मुख्यमंत्रिपद सोडल्यानंतर मित्रपक्ष भाजपविरोधात नितीश कुमारांचे हे पहिले मोठे बंड मानले जात असून, त्यांच्या या पावलामुळे एनडीएच्या ऐक्यावरच मोठे प्रश्नचिन्ह निर्माण झाले आहे.

या नव्या समीकरणाला अधिक बळ देण्यासाठी जेडीयूमध्ये (Nitish Kumar) मोठ्या राजकीय घडामोडीही घडल्या आहेत. बॉलिवूड अभिनेते दिवंगत सुनील दत्त यांची पुतणी आणि संजय दत्त यांची चुलत बहीण ममता दत्त यांनी नुकताच जेडीयूमध्ये जाहीर प्रवेश केला आहे. जेडीयूचे पंजाब प्रदेशाध्यक्ष मलविंदर सिंह बेनीपाल यांनी दिलेल्या माहितीनुसार, समविचारी पक्षांना एकत्र आणण्यासाठी ही आघाडी करण्यात आली असून जेडीयू आणि एसएडीएसएएस सर्व जागांवर आपले उमेदवार उतरवणार आहेत.

पंजाबमध्ये आधीच आम आदमी पार्टी, काँग्रेस आणि भाजप यांच्यात तीव्र स्पर्धा असताना, आता जेडीयूच्या या अनपेक्षित एन्ट्रीने लढत अधिक चुरशीची आणि गुंतागुंतीची ठरणार आहे.