Kolkata Doctor Rape-Murder Case|  कोलकाता येथील आरजी कार मेडिकल कॉलेजमधील प्रशिक्षणार्थी महिला डॉक्टरच्या बलात्कार आणि हत्येच्या घटनेवर देशभरातून संताप व्यक्त केला जात आहे. यावर आता दिल्लीतील सामूहिक बलात्कार पीडित निर्भयाच्या आईने संताप व्यक्त करत पश्चिम बंगालच्या मुख्यमंत्री ममता बॅनर्जी यांनी राजीनामा द्यावा, त्या परिस्थिती हाताळण्यात अपयशी ठरल्या आहेत, त्यामुळे त्यांनी आपले पद सोडावे, अशी मागणी केली आहे.

निर्भयाच्या आई आशा देवी यांनी कोलकात्याच्या आरजी कार मेडिकल कॉलेजमध्ये प्रशिक्षणार्थी महिला डॉक्टरवर झालेल्या कथित बलात्कार आणि हत्येच्या घटनेचा संदर्भ देताना सांगितले की, “अत्याचार करणाऱ्यांना न्यायालयाकडून तात्काळ शिक्षा व्हावी यासाठी केंद्र आणि राज्य सरकार गंभीर होत नाही, तोपर्यंत देशाच्या विविध भागात अशा प्रकारच्या क्रूर घटना घडतच राहतील. कोलकात्याच्या वैद्यकीय महाविद्यालयात मुली सुरक्षित नाहीत. यावरून देशातील महिलांच्या सुरक्षेची स्थिती समजू शकते.” Kolkata Doctor Rape-Murder Case|

तृणमूल काँग्रेस (TMC) प्रमुख आणि पश्चिम बंगालच्या मुख्यमंत्री ममता बॅनर्जी यांच्यावर टीका करताना आशा देवी म्हणाल्या, “दोषींवर कारवाई करण्यासाठी त्यांच्या अधिकाराचा वापर करण्याऐवजी, ममता बॅनर्जी जनतेची दिशाभूल करण्याचा प्रयत्न करत आहेत. मानवतेला लाजवेल अशी घटना त्यांच्या राज्यात घडते, ज्यात पोलिसांचा निष्काळजीपणा समोर येतो, या मुद्द्यावरून लोकांचे लक्ष वळवण्यासाठी ती आंदोलन करत आहे. त्या स्वतः एक स्त्री आहे. राज्याचे प्रमुख म्हणून जबाबदारी पार पाडत त्यांनी दोषींवर कठोर कारवाई करायला हवी होती. त्यांनी राजीनामा द्यावा कारण त्या परिस्थिती हाताळण्यात अपयशी ठरल्या आहेत.” Kolkata Doctor Rape-Murder Case|

देशभरात आंदोलन सुरु 

कोलकात्याच्या आरजी कार मेडिकल कॉलेज आणि हॉस्पिटलमधील प्रशिक्षणार्थी महिला डॉक्टरची ९ ऑगस्ट रोजी बलात्कारानंतर हत्या करण्यात आली होती. या घटनेने देश हादरला आहे. या घटनेबाबत डॉक्टरांमध्ये तीव्र संताप असून ते सातत्याने आंदोलन करत आहेत. राष्ट्रीय सुरक्षा कायदा आणावा, अशी डॉक्टरांची मागणी आहे. इंडियन मेडिकल असोसिएशनने आज सकाळी 6 वाजल्यापासून 24 तासांच्या संपाची हाक दिली असून त्यामुळे अनेक राज्यांमध्ये आरोग्य सेवा कोलमडली आहे.

हेही वाचा: 

‘फौजी’ चित्रपटात मृणाल ठाकूर दिसणार? अभिनेत्रीने स्वत: खुलासा करत सांगितले…