Nigdi Chakan Metro – महाराष्ट्र मेट्रो रेल कॉर्पोरेशन लिमिटेडेने (महामेट्रो) निगडीच्या भक्ती-शक्ती समुह शिल्प चौक ते चाकण असा ४०.९२६ किलोमीटर अंतराच्या नव्या मेट्रो मार्गाचा सुधारित डीपीआर (आराखडा) तयार केला आहे. नवीन आराखड्यात काही भागांचा आणि स्टेशनच्या संख्येत वाढ करण्यात आली आहे. त्या डीपीआरचे भवितव्य आता महापालिकेच्या सत्ताधाऱ्यांच्या हातात आहे. त्यांनी हिरवा कंदील दाखवल्यास हा प्रकल्प विनाअडथळा मार्गी लागू शकतो अन्यथा पुन्हा अडकून पडू शकतो. शहरात सध्या पिंपरी ते स्वारगेट अशी मेट्रो धावत आहे. या मार्गाचे निगडी येथील भक्ती-शक्ती समूह शिल्प चौकापर्यंत ४.५१९ अंतर विस्तारीकरणाचे काम सुरू आहे. या एकमेव मेट्रो मार्गानंतर शहरातील दुसर्या टप्प्यात निगडीच्या भक्ती-शक्ती समूह शिल्प चौक ते चाकण असा दुसर्या मार्गाचा आराखडा तयार करण्यात आला आहे. या ४०.९२६ किलोमीटर अंतराच्या आराखड्यामध्ये एकूण ३१ मेट्रो स्टेशन आणि हा मार्ग उन्नत (एलिव्हेटेड) आहे. त्यामध्ये शहरात सर्वाधिक २५ स्टेशन तर, चाकण नगरपालिका हद्दीत सहा मेट्रो स्टेशन आहेत. त्या प्रकल्पासाठी एकूण १० हजार ३८३ कोटी ८९ लाख खर्च अपेक्षित आहे. निगडी ते चाकण मार्गाचा आराखडा तयार करून मेट्रोने पिंपरी-चिंचवड महापालिकेला ऑगस्ट २०२५ मध्ये सादर केला. पुणे मेट्रो त्यानंतर सप्टेंबर २०२५ मध्ये दिवंगत उपमुख्यमंत्री तथा पुणे जिल्ह्याचे पालकमंत्री अजित पवार तसेच, शहरातील लोकप्रतिनिधी, भागधारकांना या आराखड्याचे सादरीकरण करण्यात आले. शहराची लोकसंख्या दिवसेंदिवस वाढत आहे. भविष्यातील वाढती लोकसंख्या आणि प्रवाशांची संख्या लक्षात घेऊन आराखड्यामध्ये सुधारणा करून तीन डब्याऐवजी सहा डब्यांच्या मेट्रो कोच ठेवाव्यात. नाशिक फाटा चौकातून संत तुकारामनगर, वायसीएम रुग्णालयाऐवजी नाशिक फाटा येथून थेट भोसरीला मेट्रो मार्ग न्यावा. भोसरीतील उड्डाण पूल अडथळा ठरत असल्यास पाडावा. वाकडमधील भुजबळ चौक येथील दोन्ही मेट्रो मार्गाची रचना प्रवाशांना सोईस्कर असावी. सर्वमेट्रो स्टेशनजवळ पार्किंग व्यवस्था करावी, अशा विविध सुचना बैठकीत करण्यात आल्या. लोकप्रतिनिधींच्या सुचनांची दखल घेऊन त्या मार्गाचा सुधारित आराखडा महामेट्रोने तयार केला आहे. सुधारित आराखड्यात मार्ग वाढल्याने तसेच, स्टेशनची संख्या वाढल्यास खर्चातही वाढ झाली आहे. या प्रकल्पासाठी केंद्र शासनाचा १० टक्के आणि राज्य शासनाचा १० टक्के आर्थिक हिस्सा असणार आहे. पिंपरी-चिंचवड महापालिकेचा खर्चाचा हिस्सा १५ ते २० टक्के असणार आहे. श्रावण हर्डीकर उर्वरित ६० टक्के निधी आंतरराष्ट्रीय वित्तीय संस्थांकडील कर्जातून उभारला जाणार आहे. सुधारित आराखड्यात भोसरीचा समावेश करण्यात आला आहे. त्यामुळे स्टेशनची संख्या वाढली असून, खर्चात वाढ झाली असल्याची माहिती आहे. या सुधारित डीपीआरचा निर्णय महापालिकेतील नवे कारभारी घेणार आहेत. त्यांनी होकार दिल्यास हा प्रकल्प मार्गी लागू शकतो. त्यात त्रुटी दाखवून पुन्हा सुधारणा सुचविल्यास हा प्रकल्प रखडू शकतो. असा आहे सुधारित मार्ग निगडी ते चाकण आराखड्यात निगडीतील भक्ती-शक्ती समूहशिल्प चौक, ट्रान्सपोर्टनगर, गणेशनगर, मुकाई चौक, रावेत, पुनावळे गाव, पुनावळे, ताथवडे गाव, ताथवडे, भूमकर चौक, भुजबळ चौक, वाकड, विशालनगर कॉर्नर, कोकणे चौक, पिंपळे सौदागर, पिंपळे गुरव, नाशिक फाटा, संत तुकारामनगर, वल्लभनगर (वायसीएम रुग्णालयाजवळ), गवळीमाता चौक, भोसरी एमआयडीसी, वखार महामंडळ गोदाम चौक, पीआयईसी, मोशीतील भारतमाता चौक, चिंबळी फाटा, बर्गेवस्ती, कुरळी, आळंदी फाटा, नाणेकरवाडी, चाकण असा हा मार्ग आहे. सुधारित आराखड्यात भोसरीचा समावेश करण्यात आला आहे. “निगडी ते चाकण मेट्रो मार्गाचा आराखड्यात तत्कालिन पालकमंत्र्यांसह शहरातील लोकप्रतिनिधींनी काही सूचना केल्या होत्या. त्यानुसार सुधारित आराखडा तयार करण्यात आला आहे. तो आराखडा महापौरांसह सर्व पदाधिकारी व नगरसेवकांसमोर सादर केला जाईल. त्यांनी मान्यता दिल्यानंतर पुढील कार्यवाही केली जाईल.” – श्रावण हर्डीकर, व्यवस्थापकीय संचालक, महामेट्रो.
