Nick Jonas: अमेरिकन गायक आणि अभिनेता निक जोनस पुन्हा एकदा सोशल मीडियावर चर्चेत आला आहे. यावेळी कारण ठरले त्याचे पत्नी प्रियंका चोप्रावरचे खास प्रेम. निकने नुकताच आपल्या इंस्टाग्रामवर एक व्हिडिओ शेअर केला. या व्हिडिओमध्ये तो प्रियंकाच्या आगामी चित्रपटाचे प्रमोशन करताना दिसतो. मात्र चाहत्यांचे लक्ष वेधून घेतले ते त्याच्या हातात बांधलेल्या मंगळसूत्राने.

व्हिडिओमध्ये निकने हातात एक ब्रेसलेट घातल्यासारखे दिसते. सुरुवातीला अनेकांना ते साधे ब्रेसलेट वाटले. पण बारकाईने पाहिल्यावर ते प्रियंका चोप्राचे मंगळसूत्र असल्याचे लक्षात आले. पत्नीचे मंगळसूत्र हातात बांधून निकने तिच्यावरील प्रेम आणि आदर वेगळ्याच पद्धतीने व्यक्त केला. भारतीय परंपरेत मंगळसूत्राला विशेष महत्त्व आहे. त्यामुळे निकचा हा हावभाव भारतीय चाहत्यांना अधिक भावला.

 

View this post on Instagram

 

A post shared by Nick Jonas (@nickjonas)

या व्हिडिओमध्ये निक प्रियंकासाठी नाश्ता तयार करतानाही दिसतो. तो तिच्या हॉलीवूड चित्रपट The Bluffचे प्रमोशन करत होता. पत्नीच्या कामाला पाठिंबा देत तो अगदी उत्साहाने बोलताना दिसतो. त्याच्या या साध्या पण मनापासून केलेल्या कृतीमुळे चाहत्यांनी त्याला “आदर्श नवरा” असेही म्हटले आहे.

सोशल मीडियावर या व्हिडिओवर भरभरून प्रतिक्रिया आल्या. अनेकांनी हार्ट आणि स्माईल इमोजी पोस्ट करत निकचे कौतुक केले. “खरे प्रेम असेच असते”, “निक खूपच गोड आहे”, “प्रियंका खूप भाग्यवान आहे” अशा कमेंट्स चाहत्यांनी केल्या. काहींनी तर भारतीय संस्कृतीचा मान राखल्याबद्दल त्याचे विशेष आभारही मानले.

प्रियंका चोप्राच्या कामाबद्दल बोलायचे झाले तर ती सध्या अनेक मोठ्या प्रोजेक्ट्समध्ये व्यस्त आहे. ती ‘द ब्लफ’ या हॉलीवूड चित्रपटात झळकणार आहे. तसेच दिग्दर्शक S. S. Rajamouli यांच्या आगामी ‘Varanasi’ या पॅन इंडिया चित्रपटातही ती महत्त्वाच्या भूमिकेत दिसणार आहे. या चित्रपटात तिच्यासोबत दक्षिणेतील सुपरस्टार Mahesh Babu झळकणार असल्याची चर्चा आहे. या चित्रपटाच्या शूटिंगसाठी प्रियंका वारंवार भारतात येत आहे. शिवाय तिचे नाव ‘007 बॉन्ड’ मालिकेशीही जोडले जात असल्याने चाहत्यांची उत्सुकता वाढली आहे.

Priyanka Chopra

निक आणि प्रियंका हे दोघेही अनेकदा एकमेकांवरील प्रेम सार्वजनिकरित्या व्यक्त करताना दिसतात. मात्र यावेळी निकने मंगळसूत्र हातात बांधून दिलेला प्रेमाचा संदेश चाहत्यांना खास भावला. छोट्या कृतीतून मोठे प्रेम दाखवणारा हा व्हिडिओ सध्या सोशल मीडियावर जोरदार व्हायरल होत आहे.