संपूर्ण देशात करोनाचा प्रसार रोखण्यासाठी संचारबंदी आणि इतर कडक निर्बंध लादले जात असताना, योग्य आणि गरजेची माहिती नागरिकांपर्यंत पोहोचण्यासाठी मुद्रित आणि इलेक्ट्रॉनिक माध्यमांमध्ये काम करणाऱ्या संस्था आणि तेथील कर्मचाऱ्यांवर कोणतीही आडकाठी लादण्यात येऊ नये, असे स्पष्ट निर्देश केंद्र सरकारने सर्व राज्यांना दिले आहेत. वृत्तपत्रांचा पुरवठा आणि वितरणाची साखळी व्यवस्थित सुरू राहावी, यासाठी योग्य ती मदत करण्याच्या सूचना सरकारने केल्या आहेत.

गेल्या महिन्याभरात करोनाची साथ देशाच्या वेगवेगळ्या भागांत पसरत असल्याने नागरिकांमध्ये हा रोग पसरू नये, यासाठी लॉकडाउनपासून ते संचारबंदीपर्यंत अनेक निर्णय घेण्यात आले आहेत. नागरिकांपर्यंत योग्य माहिती, महत्त्वाचे संदेश पोहोचविणे यासाठी सर्व वृत्तसंस्था, वृत्तपत्रे आणि दूरचित्रवाणी वाहिन्या यांच्यासह केबल ऑपरेटर, डायरेक्ट टू होम (डीटीएच) सेवा सुरळीत कार्यरत राहणे गरजेचे आहे. खोट्या आणि खोडसाळ बातम्या प्रसारित होऊ नयेत आणि योग्य आणि अचूक माहिती नागरिकांना व्हावी, यासाठी या सर्व यंत्रणा अत्यंत महत्त्वाचे काम करीत असल्याने त्यांच्यावर कोणत्याही स्वरूपाची बंधने लादण्यात येणार नाहीत, याची दक्षता राज्य सरकारांनी घ्यावी, असे आदेश केंद्र सरकारने दिले आहेत.
या सर्व सेवांचे, संस्थांचे कार्य सुरळीतपणे सुरू राहण्यासाठी राज्य सरकार, तसेच केंद्रशासित प्रदेशांचे सरकार यांनी संबंधित संस्थांना परिचालनाची सुविधा प्राप्त करून द्यावी.

‘कोविड-१९’ विषाणूचा प्रादुर्भाव रोखण्यासाठी निर्बंध घालण्याचा विचार केला जात असला, तरी संबंधित संस्थांमधील सर्व कर्मचाऱ्यांना कार्यरत राहण्याची परवानगी दिली जावी, या संस्थांच्या कर्मचाऱ्यांना प्रवासास परवानगी असावी, मीडियामधील व्यक्तींना घेऊन जाणाऱ्या वाहनांना मान्यता दिली जावी; तसेच त्यांना इंधनाची गरज भासल्यास त्यासाठी मदत करावी, विजेचा अखंड पुरवठा केला जावा आणि अन्य सुविधा तातडीने दिल्या जाव्या, अशा सूचना देण्यात आल्या आहेत. त्याशिवाय, सुरळीत आणि विनाव्यत्यय काम करण्यात कोणतीही अडचण उद्भवल्यास स्थानिक सक्षम अधिकाऱ्यांशी तातडीने संपर्क साधण्याची मुभा त्यांना असेल, असेही स्पष्ट करण्यात आले आहे.

‘वृत्तपत्रांद्वारे संसर्ग नाही’
‘करोना’चा प्रादुर्भाव रोखण्यासाठी वृत्तपत्रे नियमितपणे वाचकांपर्यंत पोहोचणे अत्यंत आवश्यक आहे. वृत्तपत्रांद्वारे ‘कोविड-१९’ विषाणू पसरत नाही, हे सरकारच्या आरोग्य यंत्रणांनी यापूर्वीच स्पष्ट केले आहे. त्यामुळे वृत्तपत्रांचा पुरवठा आणि वितरणाची साखळी योग्यप्रकारे कार्यरत राहील, यासाठी सर्वतोपरी मदत केली जावी, असे निर्देश केंद्रीय माहिती व तंत्रज्ञान मंत्रालयाने सर्व राज्याच्या मुख्य सचिवांना दिले आहेत.