नवी दिल्ली: देशातील करोडो शेतकऱ्यांसाठी एक आनंदाची बातमी आहे. पंतप्रधान किसान सन्मान निधी योजनेचा (PM-Kisan Yojana) २१ वा हप्ता लवकरच जमा होण्याची शक्यता आहे. दिवाळीत ही भेट ‘ मिळेल असा अंदाज होता, पण आता मिळालेल्या माहितीनुसार, नोव्हेंबरच्या पहिल्या आठवड्यात हप्ता थेट शेतकऱ्यांच्या बँक खात्यात हस्तांतरित केला जाऊ शकतो. तथापि, सरकारने अद्याप अधिकृत तारखेची घोषणा केलेली नाही.

या योजनेअंतर्गत शेतकऱ्यांना वर्षाला 6,000 रुपयांची मदत 2,000 रुपयांच्या तीन हप्त्यांमध्ये दिली जाते. ज्या शेतकऱ्यांनी आपले आधार e-KYC पूर्ण केले आहे आणि बँक खाते आधारशी जोडले आहे, त्यांना ही रक्कम मिळण्याची पूर्ण शक्यता आहे.

e-KYC करा त्वरित पूर्ण!

ज्या शेतकऱ्यांनी अद्याप e-KYC प्रक्रिया पूर्ण केलेली नाही, त्यांचा हप्ता थांबवला जाऊ शकतो. योजनेचा लाभ केवळ पात्र शेतकऱ्यांपर्यंत पोहोचावा आणि गैरव्यवहार टाळता यावा यासाठी सरकारने आधार e-KYC अनिवार्य केले आहे.

e-KYC प्रक्रिया मोबाइलवरून सहजपणे पूर्ण करता येते. यासाठी शेतकऱ्यांनी pmkisan.gov.in या वेबसाइटवर जाऊन होमपेजवरील e-KYC पर्यायावर क्लिक करावे. आधार क्रमांक आणि इतर आवश्यक माहिती भरल्यानंतर, नोंदणीकृत मोबाइल क्रमांकावर आलेला OTP (वन-टाइम पासवर्ड) टाकून प्रक्रिया पूर्ण करता येते.

नोव्हेंबरमध्ये येणाऱ्या २१ व्या हप्त्याचा लाभ वेळेवर मिळवण्यासाठी सर्व लाभार्थी शेतकऱ्यांनी त्वरित e-KYC अपडेट करणे महत्त्वाचे आहे, अन्यथा त्यांचे नाव लाभार्थी सूचीतून वगळले जाऊ शकते.