![\"\"](\"https://www.dainikprabhat.com/wp-content/uploads/2025/08/maruti.jpg\")
Maruti Suzuki e VITARA : आज लाॅंच झालेल्या मेड इन इंडिया ‘ई-व्हिटारा’मध्ये काय आहे खास? किंमत, रेंज, फिचर्स जाणून घ्या
Maruti Suzuki e VITARA : पंतप्रधान नरेंद्र मोदी यांनी मंगळवारी अहमदाबाद येथील हंसलपूर येथे मारुति सुजुकीच्या पहिल्या जागतिक धोरणात्मक बॅटरी इलेक्ट्रिक वाहन ‘ई-व्हिटारा’ला हिरवा कंदील दाखवून शुभारंभ केला. या प्रकल्पामुळे भारतातून युरोप, जपानसह १०० हून अधिक देशांत बॅटरी इलेक्ट्रिक वाहनांची (BEVs) निर्यात सुरू होणार आहे. यासोबतच पंतप्रधानांनी टीडीएस लिथियम-आयन बॅटरी प्रकल्पात हायब्रिड बॅटरी इलेक्ट्रोडच्या स्थानिक उत्पादनाचाही प्रारंभ केला. हा कार्यक्रम पंतप्रधानांच्या दोनदिवसीय गुजरात दौऱ्याचा भाग होता.
भारत बनणार इलेक्ट्रिक वाहनांचे जागतिक केंद्र-
‘ई-व्हिटारा’ ही मारुति सुजुकीची पहिली जागतिक बॅटरी इलेक्ट्रिक कार आहे, जी युरोप, जपानसह १०० हून अधिक देशांत निर्यात केली जाणार आहे. पंतप्रधान मोदी यांनी या दिवसाला भारताच्या आत्मनिर्भरतेसाठी आणि हरित वाहतूक केंद्र बनण्याच्या दिशेने ‘विशेष दिवस’ संबोधला. त्यांनी सांगितले की, २०१२ मध्ये गुजरातचे मुख्यमंत्री असताना मारुति सुजुकीला हंसलपूर येथे जमीन देण्यात आली होती. तेव्हाच ‘मेक इन इंडिया’ आणि ‘आत्मनिर्भर भारत’चा पाया घातला गेला, ज्याचा परिणाम आज देशाच्या यशात दिसत आहे.
#WATCH | Prime Minister @narendramodi flags off Suzuki’s first global Battery Electric Vehicle ‘e-VITARA’ in Hansalpur, Ahmedabad, for export to more than 100 countries.
Watch live: https://t.co/y3IkQXzCvL@CMOGuj #ElectricVehicle #eVITARA #Hansalpur pic.twitter.com/TcA0d0HdQj
— DD News (@DDNewslive) August 26, 2025
हायब्रिड बॅटरी इलेक्ट्रोडचे स्थानिक उत्पादन –
गुजरातमधील टीडीएस लिथियम-आयन बॅटरी प्रकल्पात हायब्रिड बॅटरी इलेक्ट्रोडच्या स्थानिक उत्पादनाला सुरुवात झाली. हा प्रकल्प टोशिबा, डेन्सो आणि सुजुकी यांच्या भागीदारीत विकसित करण्यात आला आहे. सरकारच्या निवेदनानुसार, यामुळे बॅटरीचा ८० टक्क्यांहून अधिक भाग आता भारतातच तयार होणार आहे. यामुळे भारत हरित वाहतुकीचे जागतिक केंद्र बनण्यासह ‘मेक इन इंडिया’ आणि ‘आत्मनिर्भर भारत’च्या संकल्पनेला बळ मिळणार आहे.
मारुति सुजुकी ‘ई-व्हिटारा’मध्ये काय आहे खास?
‘ई-व्हिटारा’ ही भारतात निर्मित पहिली इलेक्ट्रिक कार आहे, जी युरोप आणि जपानसह १०० हून अधिक देशांत निर्यात केली जाणार आहे. यंदा जूनमध्ये ही कार इंग्लंडमध्ये लाँच झाली होती. विदेशी बाजारात ही SUV दोन प्रमुख प्रकारांमध्ये उपलब्ध आहे – मोशन (Motion) आणि अल्ट्रा (Ultra), ज्यामध्ये वेगवेगळी वैशिष्ट्ये आणि ट्रिम्स देण्यात आली आहेत.
बॅटरी आणि रेंज‘ई-व्हिटारा’ दोन बॅटरी पर्यायांसह सादर करण्यात आली आहे. एंट्री-लेवल प्रकारात ४९ kWh बॅटरी आहे, जी १४२ bhp पॉवर आणि १९२.५ Nm टॉर्क निर्माण करते. यात सिंगल मोटर आणि फ्रंट-व्हील ड्राइव (FWD) सेटअप आहे. कंपनीच्या दाव्यानुसार, ही कार एकदा चार्ज केल्यावर WLTP प्रमाणपत्रानुसार ३४६ किमी रेंज देते. टॉप प्रकारात ६१ kWh बॅटरी आहे, जी सिंगल आणि ड्युअल मोटर पर्यायांसह उपलब्ध आहे. सिंगल मोटर व्हर्जन १७२ bhp पॉवर आणि १९२.५ Nm टॉर्क देते, तर त्याची रेंज ४२८ किमी आहे. ड्युअल मोटर व्हर्जन १७५ bhp पॉवर आणि ३०० Nm टॉर्कसह येते, ज्याची रेंज ४१२ किमी आहे.
वैशिष्ट्ये आणि डिझाइन –
‘ई-व्हिटारा’मध्ये अनेक प्रीमियम वैशिष्ट्ये आहेत. यात Y-आकाराच्या LED हेडलाइट्स, मस्कुलर बंपर, १८-इंच अलॉय व्हील्स आणि Y-आकाराच्या LED टेललाइट्स यांचा समावेश आहे. केबिनमध्ये १०.२५-इंच टचस्क्रीन इन्फोटेनमेंट सिस्टम, १०.१-इंच ऑल-डिजिटल इन्स्ट्रूमेंट क्लस्टर, फ्रंट व्हेंटिलेटेड सीट्स आणि १०-वे इलेक्ट्रिकली अॅडजस्टेबल ड्रायव्हर सीट यासारख्या सुविधा आहेत. सुरक्षिततेच्या दृष्टीने यात लेव्हल २ ADAS (Advanced Driver Assistance System), ७ एयरबॅग्स, टायर प्रेशर मॉनिटरिंग सिस्टम, फ्रंट आणि रिअर पार्किंग सेन्सर्स आणि ३६०-डिग्री कॅमेरा यासारखी प्रगत वैशिष्ट्ये आहेत.
प्रकार आणि किंमत –
‘ई-व्हिटारा’ दोन प्रकारांमध्ये उपलब्ध आहे, ज्यामध्ये एकूण पाच मॉडेल्स आहेत. ४९ kWh बॅटरी फक्त मोशन प्रकारात उपलब्ध आहे, तर ऑल-व्हील-ड्राइव (AWD) व्हर्जन मोशन आणि अल्ट्रा दोन्ही प्रकारांमध्ये मिळते. यूकेमधील किंमती खालीलप्रमाणे आहेत:
भारतात ही कार कमी किमतीत लाँच होण्याची शक्यता आहे, कारण याचे उत्पादन भारतातच होत आहे. भारतात लाँच झाल्यावर याचा थेट मुकाबला Hyundai Creta EV, Mahindra BE 6, Tata Curvv EV आणि MG ZS EV यांच्याशी असेल.
पंतप्रधानांचा हरित वाहतुकीला पाठिंबा –
पंतप्रधानांनी गणेशोत्सवाच्या निमित्ताने सांगितले की, मारुति सुजुकी आता आपल्या १३व्या वर्षात प्रवेश करत आहे. त्यांनी स्वर्गीय ओसामु सुजुकी यांना श्रद्धांजली अर्पण केली आणि त्यांच्या दूरदृष्टीमुळे आज मारुति भारतातून जागतिक स्तरावर इलेक्ट्रिक वाहने निर्यात करत असल्याचे नमूद केले. ते म्हणाले, “भारताकडे लोकशाहीची ताकद, लोकसंख्येचा फायदा आणि कुशल मनुष्यबळाचा मोठा साठा आहे. यामुळे प्रत्येक भागीदारासाठी ही ‘विन-विन’ परिस्थिती आहे. सुजुकी जपान भारतात उत्पादन करत आहे आणि तीच वाहने जपानला निर्यात होत आहेत, हे भारत-जपान मैत्रीचे आणि जागतिक कंपन्यांच्या भारतावरील विश्वासाचे प्रतीक आहे.”
चार वर्षांपासून मारुति देशातील सर्वात मोठी कार निर्यातक –
पंतप्रधानांनी सांगितले की, गेल्या चार वर्षांपासून मारुति सुजुकी देशातील सर्वात मोठी कार निर्यातक आहे आणि आता इलेक्ट्रिक वाहनांची निर्यातही मोठ्या प्रमाणावर सुरू होत आहे. “जेव्हा जगभरात इलेक्ट्रिक वाहने धावतील, तेव्हा त्यावर ‘मेड इन इंडिया’ लिहिलेले असेल, यात ‘ई-व्हिटारा’चाही समावेश आहे,” असे त्यांनी ठामपणे सांगितले.
